رسالة تحذيرية أخيرة للبرلمان المصرى !!

سجل دخولك حتى تتمكن من تسجيل اعجابك بالخبر

 

رسالة تحذيرية أخيرة للبرلمان المصرى !! 

           قارئى العزيز .. أرجوك تقرأ رسالتى المفتوحة للبرـلمان بالراحة كده ،وبـعقل مفتوح .. ولو أنا غلطان فى حاجة ياريت تسامحنى وتنبهنى .. وقد جلّ من أخطأ .

         نوابنا المحترمين .. وممثلونا فى التشريع والرقابة والحساب على االحكومة .. ورسالتى بمناسبة بدء الفصل التشريعى التانى بكره إن شاء الله .. وبرضه بمناسبة مرور 150 سنة على تأسيس أول برلمان مصرى( 1866 ) .. وتانى برلمان فى العالم بعد البرلمان البريطانى، يعنى تختشوا شوية على دمكم ، وتحطوا فى عينيكم حصوة ملح!!

          ولأننا  شعب أخترناكم بمزاجنا ، وسوء أو حُسن أختيارنا .. وبرضه ممكن نقلب عليكم الترابيزة ، ونطالب بحل مجلسكم .. فأعتقد أن كل اللى فات يعطينا الحق تقولكم اللى عايزين نقوله .. ونشدّ وِدانكم  ، وحتى نمدكم على رجليكم لما تعلطوا !!.. لأننا بالنسبة لكم الأب اللى جابكم .. واللى يقدر يطردكم من البيت فى أى وقت لما يلاقي منكم عقوق !!

          دلوقت الفصل التشريعى الأول للبرلمان أنتهى ،  ورسبتوا بأمتياز مع مرتبة الشرف !! لكن الكوسة ،والواسطة ، والمحسوبية ، ودرجات الرأفة ،ومليون معلش !! خلونا نِنَجحكم على الحُرُكرُك !! وننقلكم للفصل التشريعى التانى بس بشروط .. حاجة كده زى الأفراج المشروط عن المساجين..  زى أنهم يفضلوا تحت المراقبة سنة ولا أتنين ... وأحنا نجحناكوا  بشروط .. لكن قبل مانقول الشروط لازم نقولكم أنتوا سقطوا فى أيه؟؟

1 ـــ   المفروض بعد أنتهاء الفصل التشريعى الأول أنكم تقدموا شهاداتكم ، وتقاريركم  للشعب المسئول عنكم ، واللى أنتخبكم .. لكن أنتوا زى كل مجالس الشعب القديمة، جريتوا وقدمتوا شهاداتكم للحكومة .. وكأن الحكومة هى المسئولة عنكم!!  مش أنتم اللى مسئولين عنها .. ونسيتوا أو تناسيتوا أن المتغطى بالحكومة عريان .. ويوم ماتقعوا لحكومة هى أول من يضع سكينته على رقبتكم !!lياحلوين

 2 ـــ المفترض أنكم الهيئة التشريعية الأولى فى مصر .. .. يعنى أنتوا اللى تناقشوا القوانين بهدوء وتعقل ، وبعدها تصدروا تشريعاتكم بها .. لكن ــ  للأسف الشديد ــ أن المجلس وافق على أكتر من 300 قانون فى مدة لاتتعدى 15 يوم .. وكل القوانين مقدمة من وزارة العدل .. يعنى من الحكومة !! وأنتوا ماقدمتوش ولا قانون واحد .. وده بيطرح سؤال منطقى هو : مافيش فيكم كفاءات تقدر تناقش وتشرع قوانين ؟ ولا أنتوا أخدتوها من قصيرها وقلتوا أربط الحمار مطرح مايقول صاحبه .. وصاحبه هنا أنتم فاكرينه الحكومة  لكن فى الحقيقة أننا أحنا أصحاب الحمار ،والزريبة كلها ،  وبكده يبقى أنتم مجلس حكومى للموافقة ، مش مجلس تشريعى ممثل  للشعب ، مهمته التشريع والرقابة !!!

 3ـــ  دوركم  الرقابى على الحكومة وأعمالها ،لا  له  لون ولاطعم ، ولاحتى ريحة  ..فلم يقدم البرلمان أى كرامة للناخبين، فقد وافق على الموازنة العامة للدولة بكل  مخالفاتها  الدستورية، حتى بخصوص موازنة الصحة والتعليم، وقام على الفور بمنح الحكومة الثقة بعد الاستماع ومناقشة بيانها بهدوء وحنيه !!

 4 ـــ  برغم وجود مئات  المشكلات اللى مطلعة عين الشعب المصرى، خصوصا فى الأمور الاقتصادية، إلا أن البرلمان اللى بتحكمه أغلبية ( أئتلاف دعم مصر أو خراب مصر ) ماشفش منها المواطن البسيط أى تحسن فى مستوى المعيشة، أو أى وضوح للدور الرقابى. مع أن ياأخى  ملفات الفساد فى جميع مفاصل الدولة ، والمتعلقة بلقمة العيش ، وحياة الفقراء على عينك ياتاجر ، ومع ذلك لم يسمع المواطن عنها  أى خبر.. لاسمعنا  عن سحب ثقة من وزير أو غفير!! أو حتى أستجواب عليه القيمة لأى مسئول !! ، وكل اللى حصل وختمتم بيه الفصل التشريعى الأول  ( على أستحياء ) هو تقصى الحقائق فى قضية القمح .. وهاجت الدنيا أسبوع بكامله .. وفى الآخر نزلنا على مافيش !! وماعدناش سمعنا ، ولا عرفنا حاجة عن الموضوع  ، وكأنه موضوع محظور، وعيب الكلام فيه ، علشان مانخدش حياء أصحاب المصالح من الحيتان الكبيرة !!

           وأسمحولى قبل ماأختم خطابى أقولكم على كام نقطة سلبية كده ع الماشى واللى فقعت مرارة المصريين كلهم .. وخليتهم يضربوا نفسهم بالجزم على اليوم اللى أنتخبوكم فيه

1  ـــ   منع أذاعة الجلسات على الهواء بعد أول جلسة  حصل فيها أستعراضات للنواب ،ومشادات بين مرتضى منصور وتوفيق عكاشة .. وعلشان تداروا على فضايحكوا قررتوا عدم الأذاعة .. وكمان منعتوا الصحقيين من التصوير للجلسات  وبكده تبقوا ضربتوا االدستور فى مقتل !!

2 ــ   الحاجة الوحيدة اللى أخدت منكم وقت وجهد هو اللايحة الداخلية للمجلس .. وفى الآخر طلعت لايحة تفصيل بتلات فتحات من ورا .. وكلها كانت لصالح النواب ماديا ومعنويا من كل النواحى .. وختامها المسك أنكم أنتم ياممثلى الشعب أستثنيتم أنفسكم من دفع أى ضرايب للدولة .. لكن الشعب اللى أختاركم  يدفع ورجليه فوق رقبة اللى خلفوه !!

3 ـــ   ظاهرة طرد النواب من المجلس  لأى خروج عن المطلوب من السمع والطاعة .. وحصانة النواب  تروح فى ستين داهية !!

4 ـــ   كتر الأجازات للأعضاء .. وكتر التزويغ من الجلسة كتلاميذ المدارس .. وتعطيلهم المستمر لأعمال المجلس  اللى بيخللى ناظر المجلس الدكتور على عبد العال  يلهث بالنداء بالميكرفون .. وتهديده  بأن يطلب حضور ولى الأمر أو الأفضل أن يذنبهم برفع أياديهم على الحيطة فى البهو الفرعونى !!

5 ـــ   أنتقاء رئيس المجلس للنواب فى الزيارات البرلمانية بره مصر .. بدون آلية ، أو أصول ثابته ، أو أى شىء .. فالمطلوب من المؤهلات  هو أن تكون ولد كويس ومطيع وتقول حاضر ،وأنت حاتتغرق زيارات ومكافات !!

6 ـــ   من فات قديمه تاه .. تهافت وجرى النواب على الوزراء أثناء أنعقاد الجلسات ..علشان ياخدوا توقيعاتهم لمصالح شعبية ،أو خاصة .. ووصلت لدرجة أنهم  بدأوا يمسكوا فى بعض علشان يقعدوا جنب الوزراء  !! مش عارف أزاى ده يحصل ؟ ونتوقع منهم أنهم يسنجوبوا الوزير ده أو ده ؟؟.. والوزير والنائب كلا منهم  بيقول فى سره لوكان لك عند .... حاجة قوله ياسيدى !! لكن بقية ال..... من الشعب فيمكن ترميلهم عضمة معفنة يتلهوا فيها وخلاص !!

7 ـــ   بعد منع إذاعة الجلسات على الهواء .. النواب عملوا هوا خاص بيهم .. فكل ليلة  بيطلع علينا 5 أو 6 نواب على الفضائيات  ويقعدوا يدشوا ويحوروا علينا  فى حكايات كتيرة 90% منها كذب  و 10 % منها نخع .. والشعب يصدق ، ويسبب النائب الهمام  بلبلة فى الشارع المصرى !! وبعدين يقولك : وأيه يعنى ماالبلبلة مليانة بالشارع المصرى !! يعنى هى جتّ علينا وقالت كُخة ؟

8 ـــ   التقيلة بقى خليتها للأخر .. وهى  أوعوا .. وإياكم .. وحذارى .. تفتكروا أننا حانسمح مرة تانية أن المجلس يبقى سيد قراره !! لأ  ياحبايبى .. أحنا الشعب المصرى سيد قراره ، وقرار الدولة كلها  من أصغرها لأكبرها  .. ودم آلاف الشهداء من خيرة الشباب المصرى اللى أتهدر عبر ثورتين .. ولسه مانشفش .. وكل يوم دماء جديدة  .. علشان حريتنا وقرارنا يبقى بأيدينا ..وأوعوا تقولوا المجلس سيد قراره .. لأن شكلكم ناويين على كده !! بأمارة مشكلة أحمد مرتضى منصور وعمرو الشوبكى .. وبرغم صدور عدة أحكام قضائية من محكمة النقض ( أكبر محكمة فى مصر ) بأحقية عمرو الشوبكى فى مقعد أحمد مرتضى منصور .. إلا أنكم لغاية النهاردة مطنشين ومكبرين دماغكم ، وخايفين من مر تضى منصور !!،  وضربتوا بالقانون، وحكم المحكمة ،والدستور ،عرض الحائط  والدنيا غاراكم ، ولاهياكم  .. وفاكرينها دايمه لكم .. لكنى أحذركم  أن غروركم ، أوغبائكم وعنجهيتكم ، حاتكون أسرع وسيلة لقطع رقابكم !!

               وأخيرا بأقول لأعضاء البرلمان  إن الشعب اللى زرتوه  مرتين تلاتة أيام الدعاية الانتخابية، ولفيتوا ودوُرتوا   فى شوارعه، وحواريه ، وشفتوا بعنيكوا اللى حاياكلها الدود  ، مشاكله وأحتياجاته وبلاويه ، منتظر منكم تقفوا جنبه ، وتساعدوه فى التغلب على مشاكله ومعاناته، وتحسسوه أنه منكم وأنتم منه .. وإلا حاتلاقوه أتقلب عليكم .. وشاطكم بالشلوت خارج البرلمان بلا رجعه !!

                 يارب تكون رسالتى وصلتكم .. ولو ماوصلتش يبقى ماتلوموش غير نفسكم .. ويبقى على نفسها جنت براكش.. وقد أعذر من أنذر !!

بقلـــــــــــــــــــم

صـــلاح إدريـــــــس

 


صلاح ادريس صلاح ادريس
محررين

كاتب صحفى

0  135 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة