معركة تقطيع الهِدُوم .. بين أمريكا والسعودية !!!!

سجل دخولك حتى تتمكن من تسجيل اعجابك بالخبر

         معركة تقطيع الهِدُوم .. بين أمريكا والسعودية !!!!

 

          الأمريكان كالعادة بيتصرفوا كأسياد للعالم .. الكونجرس للمرة الـ 12  يُقرّ  وبإصرار   "قانون العدالة بحق رعاة الإرهاب" .. رغم أعتراض أوباما عليه  ( فيتو ) ..والدستور بيعطيه الحق فى هذا .. لكن الأغلبية من الحزبين الأعداء (الديمقراطى والجمهورى ) ..صمموا على تمرير القانون ، وبرضه بالدستور ..ولأول مرة فى تاريخ الكونجرس الأمريكى يتم أعتبار ( فيتو) الرئيس كأن لم يكن ويُلغى .. وكأنهم عايزين يوسخوا آخر فترة فى تاريخ حكم أوباما .

          القانون ده ياسيدى بيقول أن الدول اللى منها الأرهابيين اللى نفذوا عمليات 11 سبتمبر .. ( وعددهم 19 ..هم 15 سعوديا ،وامارتيان  ، ومصري واحد ،ولبناني ..وكلهم  تابعين لتنظيم القاعدة ) .. ومن حق عائلات الضحايا أن يرفعوا علي الدول  قضايا ،   ويحاكموهم ، وياخدوا تعويضات .. والتعويضات المبدئية تم تقديرها بحوالى 2 تريليون دولار !! ( بصراحة أنا مش عارف كام صفر .. بس مش أقل من  12 صفر  بالتأكيد !! ) .

            السعودية من مارس الماضى وهى صوتها مبحوح ، وبتننبه ،  وتحذر.. وقالت : ياناس أحنا ساعدنا فى القبض على الأرهابيين .. وقبضنا على العديد من المشتبه فيهم .. ووقفنا جنبكوا .. وأوباما قال أن السعودية شريك أستراتيجى مهم ، وحيوى فى الشرق الأوسط .. وأصوله المستثمرة عندنا كبيرة .. لكن العنجهية الأمريكية  عملت ودن من طين وودن من عجين .. وصمم الكونجرس على مقاضاة السعودية تحديدا لأن منها 15 أرهابيا متورطين فى الحادث .

        ضحايا الحادث من الأمريكان وغيرهم 2973 قتيلا .. منهم  1585 أمريكى .. وآلاف الجرحى ..

والدنيا والعة فى السعودية ،وعالمنا العربى كله .. لعدة أسباب .. أولها أن السعودية بتستثمر فى أصول ثابتة بأمريكا حوالى 750 مليار دولار .. أستنى لسه .. ده غير 385 شركة أمريكية بتشتغل فى السعودية .. وواردات السعودية من أمريكا بس حوالى 20 مليار دولار سنويا .. و عددالأمريكان العاملين بالسعودية يزيد عن  150 ألف أمريكى .. أما دولة ( آرامكو ) البترولية  داخل السعودية  دى لوحدها عايزة  عدة مقالات !!

            بالشكل ده يبقى أمريكا  ناوية على خراب بيتها بالتأكيد .. لأنها وضعت قوانين ممكن تجيب حقوق مواطنيها بالباطل صحيح .. لكن نفس القوانين حاتخرب بيت أبوها  حتى لو كان هندى أحمر .. لأننا بدون شك سنطالب بالمثل .. يعنى لو كان مات لهم  3000 أمريكى .. فأحنا أتقتل لنا فى أفغانستان ،وباكستان ،والعراق ،وسوريا  ،وليبيا  أكثر من 5 مليون مسلم ..وتشريد أضعافهم .. وإذا كنتوا بتحسبوا أنكم حاتاخدوا 2 تريليون دولار من العرب .. أحنا بقى حانخليكوا تبيعوا هدومكم ( ومش عايز أقول الداخلية !! علشان عيب!! ).. وبشرط حايكون بنفس قانونكم اللى أقرتوه .. والأدلة عندنا بالهبل والحمدلله ..بدءا من رئيسكم الغبى الأكبر بوش الأبن ،وأعترافاته الرسمية والعلنية بخطأه فى حرب العراق .. وتونى بلير رئيس وزراء بريطانيا الأسبق وأعترافاته ، بتورط أمريكا وبريطانيا فى تدمير العراق  وأسفه على ذلك (وكأنه داس على رجلنا ).. وديفيد كاميرون رئيس الوزراء البريطانى السابق اللى أعترف برضه بأخطاء معلومات المخابرات الآمريكية والبريطانية ، وتوريط الناتو فى عمليات عسكرية غير مبررة فى ليبيا وسوريا .

          ياريت تعيدوا تفكير  أيها الأمريكان .. لأن هى دى الشعرة اللى حاتقصم ظهر البعير .. وحاتلاقوا كل العرب  اللى منفوخين ومليانين منكوا من عشرات السنين .. حايفرقعوا كلهم فى وشوشكم مرة واحدة  وساعتها لا حايبقى عندكم أخضر ولا يابس !!!.

بقلـــــــــــــــــــم

صـــلاح إدريـــــس

 

 

 

 

 


صلاح ادريس صلاح ادريس
محررين

كاتب صحفى

0  236 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة