من تلاميذ .. لمجرمين ..للاجئين سياسيين!!!!

سجل دخولك حتى تتمكن من تسجيل اعجابك بالخبر

بالبلدى الفصيح :

 

من تلاميذ .. لمجرمين ..للاجئين سياسيين!!!!

 

         حكاية غريبة  كلها ظلم  ، وكيل بمكيالين  ،وتواطؤ الجميع  على تحقيق الظلم .. بما فيهم أنا اللى بأكتب .. وأنت اللى بتقرأ ، لأن الحكاية بتمسنا كلنا  ،ولا أستثنى أحدا !!

        والحدوتة بتبتدى من سنة 2014   فى رحلة مدرسية .. لأحد المصايف .. وفى الوقت ده كانت داعش  شادة حيلها ،  وكل يومين تلاتة تطلع علينا بذبح ،وقتل ،وسبى نساء وماشابه .. فبعض الأولاد ( المسيحيين ) بالرحلة ،  وداخل غرفتهم  قعدوا يتريقوا على تصرفات وآداء داعش ،  بأنهم ييقتلوا الناس ، ويكبروا ،ويتفوهوا بالدين .. وكان معهم مدرسهم وهو مسيحى أيضا ( لسوء الحظ ) .. فصورهم بتليفونه ،وهم يضحكون ويسخرون من تصرفات الدواعش .. ومدة التصوير 30 ثانية بالضبط  .. وأنتهى الموضوع لغاية هنا .

            بعد سنة كاملة  تليفون المدرس ضاع .. ولقاه طفل مسلم من القرية  ، وشاف الفيديو ، وجرى على أبوه .. ومن أبوه  لغيره وغيره .. وهاجت (قرية الناصرية ـبمركز بني مزار بمحافظة المنيا ) على الكفار .. وهجموا على بيوت  ومحلات المسيحيين اللى فى القرية ، وقذفوهم بالحجارة  ،وكسروا نوافذهم وأبوابهم ..وكسروا  صيدلية ،وأستديو مملوكين لمسيحيين .. وتهجموا على كنيسة القرية .. كل ده والأمن موجود بالقرية على فكرة .

        المهم أتعمل محضر للمدرس بتهمة إزدراء الأديان ، والنيابة أمرت بحبسه 4 أيام على ذمة التحقيق .. وأتحول الأطفال الأربعة  ( أقل من 18 سنة ) لقسم الشرطة .. ومنها للنيابة .. وكل الأجراءات دى  وراء بعضها وكل واحد توصله القضية  عايز يخلص منها بسرعة ،ويرميها بعيد عنه  ،فيصدر أشد قرار فيها .. وأنتهت بأن المدرس  أتحكم عليه  بكفالة 10 آلاف جنيه ، بس فضل محبوس بقسم شرطة بني مزار كام يوم زيادة قبل مايسيبوه .أما جهة عمله بقى ( وزارة التربية والتعليم ) وقفت صرف مرتبه .. ولا حتى نصفه  حسب ما القانون بيقول فى مثل حالاته .. وكمان مارضيوش يعطوه تحويل لمدرسة تانية .. علما أن الجلسة العرفية اللى أتعملت ( وهى دى اللى موديانا فى ستين داهية ) .. حكمت الجلسة بتهجيره ، أو ترحيلة هو ومراته وأطفاله الثلاثة من القرية .. وعدم عودتهم لها نهائيا .. وكمان وزارة التربية والتعليم  رفضت تعطيه خطاب تحويل لمدرسة تانية !!!!! وأتحكم عليه بـ 3 سنوات سجن  .. وكفالة ألفين جنية لأيقاف تنفيذ الحكم مؤقتا لحين الأستئناف

         الولاد بقى  قعدوا فى الحبس 60 يوم  ، لأن النيابة بتجدد حبسهم .. 60 يوم كانوا أسوأ  60 يوم فى حياة الولاد دوول  !! وحايفضلوا محفورين فى ذاكرتهم لآخر العمر   .

          المحامى بتاع الولاد قال  فى المحكمة : أن القصد الجنائى غير موجود بدليل أنهم لم يرتبوا مسبقا للتصوير .. وأن الفيديو لم يذاع على أى جهة .. وأن مدته 30 ثانية يعنى نص دقيقة .. وأنهم أطفال وكانوا بيهرجو ا زى ماكل المسلمين بيهرجوا على مواقع التواصل ، ورسامى الكاريكاتير على الصحف الحكومية يتهكمون علنا على الدواعش وتصرفاتهم .. وطلب المحامى الفيديو المتحرز ، لتشاهده المحكمة ،ويثبت كلامه ,, لكن القاضى رفض !! ولم يسمع أى كلام من المحامى ،  وحكم على الولاد بالحبس 5 سنوات .. وكفالة 10 آلاف جنيه !!!!!.

             طبعا أتدفعت الكفالات  .. وخرج الولاد مؤقتا .. لكن طبعا هم وأهلهم كانوا متأكدين أنهم حايتحبسوا  يعنى حايتحبسوا .. ويضبع مستقبلهم وحياتهم كلها !!!! وعلشان الخوف ده وفى أبريل اللى فات  أستطاعوا السفر ، أو بمعنى أصح الهرب  بمعاونة بعض مسئولى حقوق الأنسان إلى تركيا .. وقعدوا هناك  لغاية أول إمبارح الثلاثاء 6 سبتمبر 2016.. لغاية مالقوا مليون واحد  يساعدهم  فى الحصول على تأشيرة لسويسرا .. ووصلوها بسلام الله .. وفور وصولهم طلبوا حق اللجوء السياسى .. والأكيد أنهم سيحصلوا عليه بسرعه ..  وتجمعت كل صحف وتليفزيونات العالم  لتصورهم ، وتلتقى بهم ، وتسمع حكاياتهم ..عن حدوتة الظلم اللى  وقعوا فيه من طقطق لسلاموا عليكوا .. حلو كده ؟؟؟

                وأنا بأدين وبشدة مسلسل الغباء الأزلى المتكررللسادة  المسئولين !! .. لأنهم أولا حاكموا أطفالا على ضحك مدته 30 ثانية !!..  ثانيا غمضوا ،وطرمخوا ، ويمكن ساعدوا  كمان على هروبهم ،وكأنهم قاصدين أنهم يخلصوا منهم ، وفلى نفس الوقت يوصلوهم وبلادهم إلى فضايح بجلاجل ، حايفضل صداها وأعلام العالم يتكلم عنها أيام وأيام ،  وأحنا بنقول ياحيطة دارينا ، وبنحاول نصلح صورتنا المشوهة لجذب السياحة .. والآهم بقى أن عندنا مسلمين ونشطاء بيهينوا ويزدروا الأديان ليل ونهار ، وعيانا بيانا ، وعلى الفضائيات ،والمنابر .. والرئيس بيصوت ويصرخ  : (الخطاب الدينى .. الخطاب الدينى .. الخطاب الدينى ) ولا حد بيسمع  ، ولا حتى عايز يسمع .. ونووووم وشخير .. وكأن الراجل بيدّن فى مالطا !!

            والحكاية بأختصار  لو أنت  راجل هادى ،ومحترم ومالكش فى قلة الآدب  حاأبهدلك ،وأحبسك ،وأطلع سلسفيل اللى جابك !!.. لكن لو مشاغب ،وقليل الآدب ، ولسانك طويل وصوتك عالى ، يبقى حاأحترمك ،وأطنش ، وأعمل نفسى من بنها  .. ( ياريت تراجع  معايا  صفات كل اللى أتحبسوا وأتهانوا .. وصفات كل اللى تم الأستماع لهم ،وتنفيذ مطالبهم .. ولو الحكاية مش حاتطووول  كنت ذكرت لك  المئات  بالأسماء من دووول  ومن دووول )

          عايزين الحق ياجماعة الخير  أنا رأيى أن الحكومة تنقل مقر رئاسة الوزراء  بصفة رسمية ودائمة  إلى ( بنها ) !!!!  على ماتُفررررج !!!

بقلــــــــــم

صــــلاح إدريـــــــــس

Salahedris @gmail.com

 

 

 

 

 

 

 


صلاح ادريس صلاح ادريس
محررين

كاتب صحفى

0  263 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة