إنسف وزاراتك القديمة ياسيسى !!

سجل دخولك حتى تتمكن من تسجيل اعجابك بالخبر

بالبلدى الفصيح :ــ

إنسف وزاراتك القديمة ياسيسى !!

 

         كواليس رئاسة الوزراء والصحف والمواقع الأخبارية  من إمبارح السبت  وهى بتغلى بأخبار عن تغيرات فى بعض الوزارات .. والخبر شبه مؤكد .

          بس بصراحة أنا لى  رأى خاص فى الحكاية دى   وهو .. إذا كان الوزراء اللى حاييجوا زى اللى فاتوا   يبقى بناقص أحسن ؟!!  .. يعنى لو حاتجيبوا وزراء موظفين مطيعين ،والأختيارات حاتتم على هذا الأساس .. يبقى نبوس أيديكم بلاش !! .. ولو حاتجيبوا وزراء من الأصدقاء  والمحاسيب ،وأصحاب الدم الخفيف وقعدة الطاولة والشطرنج  ، ورفقاء النادى ، أو الجامعة ، أو الكافية أو الكامباوند ..برضه يبقى مش عايزين .

            أحنا وأنتم عارفين أن الرئيس السيسى راجل عسكرى ، ومالوش خبرة سياسية  على القدر الكافى ..  يبقى العقل بيقول أن الحكومة اللى بتساعده لازم تكون حكومة سياسية  ، بتفهم كويس قوى فى السياسة ، مش سمعت عنها ،ولا شافتها فيديو .. عايزين  وزراء سياسيين  خصوصا فى الوزارات الهامة ، وغير الفنية بتاعة التكنوقراط .

       وبصراحة أكتر  أنا مش فاهم  يعنى أيه  مهندس ووزير بترول يبقى رئيس وزراء .. الراجل مهندس وطول عمره فى البترول والآبار ، وعمره ماخرج فى مظاهرة .. وحتى لغاية دلوقت وهو رئيس الوزراء    بيعمل لقاءاته الهامه جدا فى مكتبه القديم بإحدى شركات البترول  ،بمدينة نصر .. ورحم الله إمرؤا عرف قدر نفسه .

            أنا بأتمنى من كل قلبى  منك ياريس أن تشكل حكومة سياسية  ، تساعدك وتقف جنبك بحق .. بدل شلة الموظفين دى اللى بتراقبك ،وتشوفك عينك رايحة  فين وتجرى تعمله  علشان ترضيك .. وتنفذ أحلامك قبل ماتحلمها .. مايتفعش الكلام ده ياريس .. أنت عايز ناس شجاعة ، وفاهمة .. تراجعك وترشدك وتنور الطريق أمامك ..من غير ماتغشك ،ولا تنافقك ..ياللا  ياريس  أنسف وزاراتك القديمة من الأساس .. وأبدأ على ميه بيضا .

بقلـــــــــــــــم

صــــلاح إدريـــــــــــــــــــس

salahedris@gmail.com

 


صلاح ادريس صلاح ادريس
محررين

كاتب صحفى

0  282 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة