سقوط البرلمان فى الفصل التشريعى الأول .. وبالمحسوبية والكوسة أتنقل لفصل تانية أول !!!

سجل دخولك حتى تتمكن من تسجيل اعجابك بالخبر

سقوط البرلمان فى الفصل التشريعى الأول ..

وبالمحسوبية والكوسة  أتنقل لفصل تانية أول  !!!

 

                النهاردة الأربعاء 31 أغسطس 2016  آخر يوم فى الفصل التشريعى الأول  للى مايتسماش  ( مجلس النواب ) !!!!

           بعد الأستفتاء على الدستور. وتلافى كل أخطاء الماضى بقدر الأمكان .. وخروج دستور مشرف بشهادة العالم كله .. ومنح مجلس النواب  صلاحيات  كنا نراها فى برلمانات العالم  ، وطول عمرنا  بنتمناها لبارلماننا المصرى .. وماكناش نعرف أن خيبة الأمل جايلنا راكبة جمل!!! .. وأننا أدينا الحلق للى  بلا  ودان !!

        فجأة طلعلنا حاجة كده أسمها (أئتلاف دعم مصر)  وهو فى الحقيقة (خراب مصر) .. وبدأ يشكل أغلبية فى المجلس ، بحجة أنه بيدعم مصر .. وكأن النواب اللى أخترناهم جايين يخربوا مصر .. والحقيقة أن موروث عقلية الحزب الوطنى القديم  ،وحزب الحرية والعدالة  الأخواني فيما بعد ..كانت مسيطرة على عقولهم .. ونسيوا تماما أو تناسوا أن المجلس ده  جه بعد ثورتين شعبيتين !!

          وإذ فجأة أيضا  لقينا الأغلبية دى أستحوذت على رئاسة المجلس ،وجابت لنا واحد  لا  ليه فى الطور ، ولا فى الطحين !!! وعمره ماأشتغل فى السياسة ، من لسانه !! ولا حتى مشى فى مظاهرة ..فهو أستاذ جامعى ، و رجل قانون .. لكن الأهم بالنسبة لهم أنه راجل مطيع ، ومتعاون  ، مع  الأغلبية اللى جابته  ..والنتيجة أنه مش قادر لا يحكم ،ولا يتحكم فى المجلس ، وجماعته يقولوله يمين  يبقى يمين .. شمال يبقى  شمال  .

         وعلشان خايفين من الفضايح على الهوا والسلخ اللى حاينزل على رؤوسهم .. منعوا البث التلفزيونى المباشر .. وتحول المجلس لفصل مدرسى .. اللى يعلى صوته  ينطرد من الفصل .. واللى يخرج عن الآدب ينطرد من المدرسة .. واللى يخرج عن المألوف والتعليمات  الحكومية اللى بيرعاها (أئتلاف خراب مصر ) من غير الحكومة ماتكلفه ولا حاجة ، وهمه متبرعين  لحماية  الوطن ؟؟ ينطرد من الدنيا كلها .

             ولو حاأقعد من النهاردة لآخر أكتوبر  أدلل على خيبة وفشل البرلمان  مش حايكفينى الوقت .. لكن بأختصار ومن أفواه أعضائة ، فى المقابلات الصحفية ،والتليفزيونية  العلنية والمباشرة .. فإن القرارات اللى على  على هوى (أئتلاف خراب مصر)  تتنفذ فورا ،   وأى طلبات مش على مزاجهم  ،  تترمى فى الدرج  ، أو الزبالة وبرضه فورا .. والأحكام القضائية اللى مش على مزاجهم  برضة لا تنفذ ومواد وبنود الدستور اللى جابهم ، واللى أعطاهم صلاحيات  عمرهم ماحلموا بيها ، مابيتنفذش منها  إلا اللى على هواهم  ومصالحهم بس ، يادووب ياخدله  ساعتين تلاتة ويتنفذ فورا  وبالأكتر تانى يوم  .. والباقى طنش ياعم الحاج .. فإذا كان المجلس التشريعى بيطنش على الدستور ومواده ، أومال باقى أجهزة الدولة  ، والشعب يعملوا أيه ؟ .. بيتهيألى ممكن يمسحوا بيه القزاز .. ولا  يفرشوه على الطبالى .. وسلملى على الدستور والشرعية !!

              ونواب الشعب هم الوحيدون بين طوائف الشعب كله اللى مابيدفعوش ضرائب  !!!  بناءا على وجود هذا الشرط فى لائحة المجلس .. لأن على راسهم ريشة ، وهمه ولاد الوزة البيضاء .. والشعب كله ولاد البطة السودة !!

           واللى صوته عالى منهم زى مرتضى منصور وغيره يتعملهم  مليون حساب .. والمحترمين الهاديين  يتركنوا ويتضربوا على قفاهم ، وممنوع عليهم ينطقوا !!

            لجنة حقوق الأنسان  برئاسة محمد السادات ماتنفذش لها قرار ، أو طلب واحد من بين أكتر من 500 طلب  ، و قرار أتخذتهم اللجنة .. وأخيرا الراجل طق من جنابه  ، وخاف يحصل أخوه المرحوم طلعت السادات .. فتقدم بأستقالته من اللجنة إمبارح الثلاثاء 30 أغسطس 2016.

           أما نسبة حضور الأعضاء للجلسات لاتتعدى الـ30% ..  ومش ناقص غير ( الألفة ) بتاع الفصل ، يسجل الغياب فى كشف الغياب !!   وحتى وهمه موجودين فى المجلس تلاقيهم متجمعين  بينمنموا فى البهو الفرعونى  ، ولا أى كافتيريا .. أو بيشيشوا فى أى مُكنة جوه المجلس  .. وسايبين الجلسة فاضية ، و الأعضاء اللى فيها  نايمين نتيجة للهدوء الشديد  داخل القاعة المكيفة ...ماأحنا أنتخبناهم علشان الونسة والحكايات .. وبصراحة البرلمان ده جه على راسنا نكسة ووكسة .. وإنشاءالله ربنا حايخلصنا منه  قريب على خير !!

          النواب القدامى بيحلفوا بالله العظيم ثلاثة أن برلمان الأخوان كان أفضل ألف مرة .. لأنه كان فيه سياسة  ،وخد وهات .. وماكنش فيه التهديد ،وكتم الأفواه اللى بيستعملهم (عصابة خراب مصر) .. يعنى نوابنا عايزين يوصلونا بغبائهم ،وأستهتارهم  ، لأن نقول أن برلمان أخوان الخنازير كان أفضل من هذا البرلمان  ، الوحيد اللى أنتخبناه فعلا بإرادة حرة ، وبشفافية ، ونزاهة ، وعملنا له دستور منحه من الصلاحيات  مالم يحصل عليها أى برلمان مصرى قبل كده  !!

            أيها النواب .. لقد سقطتوا بجدارة فى أول فصل  بمرحلتكم التشريعية .. ولو كنتوا أتنقلتوا للفصل التانى  فهذا تم بالواسطة ،والكوسة ، والزفت ،اللى معشش جوه مجلسكم .. لكن لازم تعرفوا وتتأكدوا أن الشعب خلاص حط أيديه الأتنين فى الشق منكم .. وحايطنش غصب عنه عن أنتقالكم للصف التانى  .. لكن والكلام هنا (للنواب الشرفاء الحقيقيين اللى مش راضيين على اللى بيحصل)  .. بنقولهم  : لو أتكرر فشلكم فى الفصل التانى  .. ومقدرتوش تعدلوا من زملائكم ،ومجلسكم ،ورئاسته .. فتأكدوا أنه سيكون هذا آخر فصل لكم .. وسيتم طردكم نهائيا من المدرسة .. وحتى مش حاتعرفوا تذاكروا منازل بعد كده ،  لآن من الواضح أنكم حتى لا بتعرفوا تقرأوا ، أو تكتبوا ، أو حتى تبصموا !!!

بقلــــــــــــــــــــــم

صـــــلاح إدريـــــــــس

 salahedris@gmail.com

 

 


صلاح ادريس صلاح ادريس
محررين

كاتب صحفى

0  174 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة