الفاشلة .. حاتعمل أيه فى مؤتمر الناجحين ؟؟

سجل دخولك حتى تتمكن من تسجيل اعجابك بالخبر

 الفاشلة .. حاتعمل أيه فى مؤتمر الناجحين ؟؟

         أفتكر كلنا عرفنا وأتأكدنا أن دول العالم الكبيرة والصغيرة مايهمهاش غير حاجة واحدة بس ،هى مصالحها ،ومصالحها فقط  ،أولا وأخيرا .. و الدنيا مصالح ياأبوصالح!!

         يبقى لما الصين تدعو مصر لمؤتمر العشرين الأقتصادى  .. يبقى الصين والعالم كله شايف أن مصر بالتأكيد وبدون أى شك هى الحصان الأسود الرابح فى الأعوام القادمة .. ولكن قبل ماندخل فى تفاصيل الموضوع ده  خلونا الآول نتعرف على أيه هو مؤتمر العشرين ده ؟.

             دول العشرين دى من  البداية كده هى اللى  بتمثل الدول الأعضاء وبتملك قرابة ٩٠ % من الاجمالى العالمى للانتاج القومى، فى كل حاجة   .. و 80%  من نسبة التجارة العالمية ( بما فى ذلك التجارة الداخلية للاتحاد الاوروبى )، وكمان  بتمثل الدول الأعضاء ثلثىن سكان العالم ، غير  الثقـل الاقتـصادى لأعضاء المجموعة  ، واللى بيعطيها  درجة عالية من الشرعية ، والتأثيرعلى إدارة النظام المالى والاقتصادى العالميين .

مين بقى همه الدول الأعضاء  فى مجموعة العشرين :

بتتألف مجموعة العشرين من وزراء المالية ،ومحافظى البنوك المركزية مـن ١٩ دولة همه  : الأرجنتين / أستراليا / البرازيل / كندا / الصين / فرنـسا / المانيـا / الهنـد / اندونيسيا / ايطاليا / اليابان / المكسيك / روسيا / الـسعودية / جنوب أفريقيا / جنوب كوريا / تركيا / بريطانيا / أمريكا / الأتحاد الأوربى  .

         وبيشارك بشكل غير رسمى فى اجتماعات المجموعـة كل من المدير الإدارى لصندوق النقد الدولى  ، ورئيس البنك المركزى ; إلى جانب رؤساء اللجان المالية الدولية ، ولجان النقد الدولى ، ولجان التنمية لـصندوق النقـد الدولى ، والبنك المركزى . وبكده تبقى  جمعت مجموعة العشرين بين دول الـسوق البارزة ،وكبرى الدول الصناعية من جميع أنحاء  العالم.

     و زى ماأنتوا شايفين كده  اللى ماسكين المجموعة وبيديروها ، ويشرفوا عليها  رجال مال وأقتصاد وبنوك .. ومالهمش دعوة خاااااالص بالسياسة .. وحياتهم كلها أرقام وأرباح وخسائر .. ومايفهموش فى السياسة أصلا ،وماتهمهمش أساسا .. اللى يهمهم هو الأررجا  .. المونى .. المونى وبس ،والمكاسب  اللى حاتدخل ..

       ولو ماشافوش فى مصر أقتصاد واعد  ،ومثمر ،وكبير  ماكانوش عبّرونا أصلا  ، ولا سألوا علينا .. لكن كونهم يدعونا للقمة بتاعة مجموعة العشرين  ..واللى بتتجمع قيادات دولها  كل حين وميل .. فمعناها  واحد  ، ومايحتاجش تفسير تانى  .. وهو أن سياسة السيسى ورؤيته المستقبلية فى المشاريع العملاقة  هى سياسات ناجحة ..زى محور قناة السويس ،والمليون ونص مليون فدان ،والصوامع ،والبيتروكيماويات ، والتنقيب عن البترول والغاز والدهب ..  وعشرات الآلاف من الطرق ، والطاقة  ،والطاقة البديلة ،والمدن الصناعية فى دمياط والصعيد ..  وغيرها ،وغيرها من المشروعات المستقبلية .. مش مشروعات (عيشنى النهاردة  وموتنى بكرة).. اللى كنا عايشين بيها أكتر من 60 سنة !!  وثبت فشلها الذريع .. ومع ذلك ياأخى تصدق أن فيه ناس لسه عايزة السياسة العرجة دى !!

           وطبعا الدول دى عارفة كويس قوى قدرات مصر وثرواتها  .. وأنها بالأستغلال الصح لهذه الثروات ممكن تكون الأولى على العالم بلا مبالغة .

      علشان ده كله وزيادة أرسل الرئيس الصينى الدعوة للسيسى ، وأكد  على ضرورة حضوره ، فمن ناحية يحضر السيسى المؤتمر ، ويشوف أيه هى الأمكانيات الأقتصادية للأستثمار فى المشروعات الكبرى بمصر .. ومن ناحية تانية فإن الصين ترغب بشده أن يكون لها  دور فاعل فى الشرق الأوسط .. وأستثمارات وتبادل تجارى ضخم .. وطبعا مش حاتلاقى بوابة أفضل من مصر للدخول من خلالها للشرق الأوسط ..

          أطمئنوا ياأخوانا مصركم بخير .. وأقتصادكم بخير .. وأوعوا تسمعوا للأشاعات السخيفة ، والكلام الأهبل اللى بيقوله أعدائنا وجهلائنا .. مصر جاية وبقوة .. وعلشان أنت مش حاسس قوى بكده .. فلآن السيسى بيعمل لولادك وأحفادك  .. مش لك أنت زى ماكانوا بيعملوا قبل كده علشان تاكل سد الحنك،وتقفل بقك ، وتخلفلك عيلين تلاتة ، وتنام !!

      الراجل بيبنى للمستقبل علشان الكل يرتاح بعد كده .. ولو أن الكلام ده حايخللى كتير يقولوا علىه  سيساوى !!  بعد ماكنت معارض شرس لكل العهود السابقة  !!   لكن إذا كانت مصر جاية ،والعالم شايفها ومتأكد أنها جاية .. وكله بفضل الراجل اللى ( تقريبا ) شغال لوحده ،وأسمه عبد الفتاح السيسى .. فأيوه  ،ومليون أيوه  ،أنا سيساوى .... واللى مش عاجبه يخبط راسه فى الهرم الأكبر .. أو يشرب من أكبر بحر !!!

بقلــــــــــــــم

صـــــــــــــلاح إدريــــــــس

salahedris@gmail.com

 


صلاح ادريس صلاح ادريس
محررين

كاتب صحفى

0  203 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة