قنبلة مدوية .. حايفرقعها السيسى قريبا .. قائلا لأوباما : أمك فى العِش .. ولا طارت ؟

سجل دخولك حتى تتمكن من تسجيل اعجابك بالخبر

قنبلة مدوية .. حايفرقعها السيسى قريبا ..

قائلا لأوباما : أمك فى العِش .. ولا طارت ؟

 

            عايزين تعرفوا الحكاية ؟ ... حاأقولهالكوا  من البداية ..

       لما الشعب المصرى أسقط مبارك .. كان ده على قلب الأمريكان زى العسل  لأنه أول الخيط فى تنفيذ مخططهم الطويل  واللى بقالهم سنين بيرسموا له .. وكل المصريين عارفينه دلوقت ومافيش داعى أطول عليكم فى الجزء ده  ، علشان ماتزهقوش  لأن اللى جاى سخن ومولع  قوى ..!!

       طبعا الأخوان ركبوا الثورة .. وأستولوا على الحكم .. وأفتكروا أن الدنيا زهزهت لهم ،  وأنهم قاعدين على قلوبنا 500 سنة لقُدام .. ومسك الرئاسة الأستبن  محمد مرسى .. بس فى نظر الأمريكان ،والأخوان كلهم ،والمصريين كمان  أنه أستبن  مش اكتر  ..وأن اللى بيحكم مصر فعلا مش قصر الأتحادية بمصر الجديدة ..ولكن  مكتب الأرشاد اللى فى المقطم .. !!!

        قوووم أيه .. الغبى الأمريكى باراك أوباما  يتفق أتفاق مكتوب فى وثائق   مع الأستبن محمد مرسى  أن أمريكا تشترى 40%  من مساحة سيناء .. مقابل 8 مليار دولار!!!! .. وطبعا الأستبن مالوش رأى ولا كلمة ،  ولكن جاء الضوء الأخضر بالموافقة من مكتب الأرشاد ، ورجل الأخوان القوى (أبولهب ) ا الشهير بخيرت الشاطر .. !!

        وبالفعل أبولهب أو خيرت الشاطر أستلم الـ 8 مليار دولار .. بعد ماوقع مع مرسى ، والشماشرجى بتاعهم عصام الحداد على الوثائق .

       قووووووم أيه .. المصريين ماأستحملوش الأسلام السياسى .. وحسوا أنهم أنضربوا على قفاهم .. وثورتهم أتسرقت منهم .. وأحلامهم اللى حلموها فى الـ 18 يوم الأولى للثورة أتبخرت ،وأتقلبت لكابوس منيل بستين نيلة .. وبدال ماتيجى ديمقراطية حقيقية  جالهم اللهو الخفى .. وأتقلبت مصر فى شهور قليلة إلى  شادر  كبير للعزاء  ..الناس بتندب فيه حظهم المنيل ليل ونهار .. وفجأة طلع الأمل فى السيسى ، والناس ماصدقت تتعلق بقشاية ., فأتعلقوا بالراجل ومسكوا فيه بـأيديهم وسنانهم  !!

      وكلكم عارفين الجزء  ده لأنكم شاركتوا فيه ..  وهى ثورة 30/6 .. وأتخلصنا من الكابوس اللى كان كاتم على نفسنا ، وحايموتنا .. وأتلهينا أحنا بقى فى مشاكلنا مع الأرهاب من ناحية  .. ومع الأقتصاد ولقمة العيش من ناحية تانية .. والعجلة دارت .. وعايشين ومستحملين على أمل أن بكرة أحسن ،والقادم أفضل بإذن الله .

     فى الناحية التانية بقى من العالم .. فى أمريكا .. عمنا الغبى أوباما  واقع فى حيص بيص ،ومشكلة سودة .. الكونجرس الأمريكى بيطالبه أنه يرجع فلوس الشعب الأمريكى اللى هيه  الــ 8 مليار اللى أخدهم خيرت الشاطر .. وأوباما مش عارف يرجعهم أزاى ؟  وبعد إلحاح  وضغط من الكونجرس  أضطر أوباما  يطلب من السيسى تنفيذ الأتفاق اللى  فى الوثائق الموقعة بينه وبين مرسى  ،وخيرت الشاطر !!!.. طبعا السيسى قاله  : هى أمك فى العش ولا طارت  ؟؟.. مرسى فى السجن  ،ممكن تسأله عن الفلوس ضيعها فين ؟ لكن خيرت الشاطر بأى صفة  تعطوه فلوس  أصلا وهو لم يكن له أى منصب من أى نوع فى الدولة المصرية  .. وعصام الحداد  ده مجرد شماشرجى  ذكى شوية  وشغلته راحة أسيادة وبيتفنن فى كده  .. وده شخشيخة مالوش أى لازمة   ..  ومن الآخر ياأوووبا  فلوسكم مش عندنا .. روحوا دوروا عليها !!

       وبكده يبقى عرفنا حالة الجفاء اللى بين أوباما والسيسى سببها أيه ؟.. المهم بقى فى الموضوع أن مصر أخيرا أستطاعت أن تحصل على كل الوثائق اللى فيها الحكاية دى من طقطق للسلاموا عليكوا ..وبتوقيعات كل الخرفان الأمريكان والمصريين  دوول .. ومصممة أن  تنشرها علنا على الشعب المصري بعد أنتهاء التحقيقات فيها .. والكلام ده حايتم قريب قوى قوى ..

ومن ناحية تانية  أعضاء الكونجرس ناويين يجرسوا أوباما ويفضحوه .. ومع أنه فاضل له فى الرياسة  3 شهور  بس ..  لكن همه عايزين يسحبوا منه الثقة  علشان تبقى فضيحة وجُرسة .. ويكون أول رئيس أمريكى فى التاريخ تنسحب منه الثقة ..

      وشكلنا الأيام اللى جاية حانقف ع الحيطة .. ونسمع الزيطة .. واللى عايز يقعد ع الحيطة يقعد .. المهم فى النهاية كلنا حانسمع الزيطة اللى جاية من  الكونجرس وأمريكا كلها !!.. وحانسمعها عندنا هنا لأن الصوت والصراخ حايكونوا عاليين قوى .. والصوت الأعلى حايكون الرد المصرى بالوثائق والمستندات اللى تحت أيدينا  .. وموسى نبى .. وعيسى نبى .. ومحمد نبى .. وكل من له نبى يصلى عليه !!!

       ومحدش يسألنى جبت الأخبار والمعلومات دى منين ؟ لأنى عندى مصادرى ومطبخى الخاص .. وأنا آهووه مش حارمكم من حاجة خالص .. وأنتظروا  قنبلة السيسى اللى حاتنفجر فى وش ناس كتير خلال الأيام الجاية !!

                      بقلـــــــــــــــــــم

                       صـــــلاح إدريـــــــس

  salahedris@gmail.com                            

 

 

 


صلاح ادريس صلاح ادريس
محررين

كاتب صحفى

0  239 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة