لوجالك الطوفان .. حُط أبنك تحت رجليك قبل القرد مايبقى سلطان !!!!!!

سجل دخولك حتى تتمكن من تسجيل اعجابك بالخبر

بالبلـــدى الفصيـــح :

 

لو  جالك الطوفان .. حُط أبنك تحت رجليك

قبل القرد   مايبقى سلطان  !!!!!!

 

            قردوغان خايف ومرعوب  وميت فى جلده ، من ساعة أنقلاب الجمعة اللى فاتت .. والدليل الفوضى اللى بتحصل فى تركيا دلوقت  .. فالأعتفالات تمت لأكتر من 50 ألف شخص ، عسكرى ومدنى .. وفصل  أكثر من 30 ألف مدرس وموظف .. وطلب أستقالات من أكثر  من 15 ألف مدرس وموظف .. وطبعا جاتلله  فرصة ذهبية للتخلص من القضاة اللى كانوا ناويين يكشفوا قضايا فساده هو وأبنه وعصابته!!   فتم القبض وأنهاء خدمة مايقرب من 3000 قاضى .

        وعلشان يخزى العين عن اللى بيهببه  راح يطالب أمريكا بتسليمه  صديقه القديم اللدود زعيم المعارضة الأسلامية ( عبدالله جولان ) .. والمقيم بأمريكا .. بحجة أنه مُدبر الأنقلاب الفاشل !! وأمريكا بتقوله : أدينا دليل على أنه مدبر الأنقلاب .. وهو يرد ويقول: هوه  فيه بين الأصحاب أدلة  وكلام فاضى من ده  ؟؟،  أومال أحنا أصحاب وحلفاء أزاى وتطلبوا منى أدلة ؟.. وأنتوا لازم تثقوا فى كلامى !! (وطبعا الكلام ده عند أم التيتى ..مش أمريكا اللى يهمهما فى الآول والآخر مصالحها الحالية ،والمستقبلية ،وكل خطوة بتعملها بحساب وبالمِللى ) .. وفى نفس الوقت الأعلام التركى كله  (تقريبا )  نازل شتيمة وتوبيخ فى أمريكا ،  وبيقول أن الأمريكان هم اللى دبروا  وخططوا للأنقلاب !!

          واللى زود الطين بلَة فى الحالة التركية الملخبطة دى هى التعليمات الرئاسية  بأن يتم القبض فورا على أى أشخاص يتم الأبلاغ عنهم ، من طرف الأخوان المسلمين ،أعضاء حزب قردوغان ( العدالة والتنمية ).. يعنى فرصة راااائعة  لكل واحد  خسيس من الأخوان عايز يتخلص من عدوه .. لأسباب شخصية بقى ولا مش شخصية  مش مهم !! المهم يتخلص من عدوه وخلاص .وتولع الدنيا ، وتتلخبط عيشة على ام الخير .. و آهو مولد بقى  وصاحبه غايب .

        الخوف مليان فى قلوب الناس كلها .. فالشرطة خايفة من أهل المقبوض عليهم ، وتوقع بأحتمال يقلبوا عليهم ويبدأوا فى تصفيتهم  ،أنتقاما لذويهم .. والجيش مكسور ومجروح،  واللى باقى منهم بيفكر فى اللى جاى أيه ؟  الشعب  كله خايف من بعضه !! حتى داخل العيلة الواحدة .. فالجميع بيقول لو جالك الطوفان حُط أبنك تحت رجليك !!!  فأنعدام الثقة والشكوك القاتلة هى السائدة فى تركيا الآن .

           والأحوان المسلمين شكلهم كده عايزين يخلّصوا على أى حد مش أخوانى  .. والحد  اللى مش أخوانى ده  هو كمان بيحاول ينقذ راسه ، ويتحول لأخوانى .. حتى لو باللسان فقط  !!  ولأثبات إخلاصه بيبلغ عن 10 أو 15 واحد من أعدائه ، ويقول عليهم  أنهم ساندوا الأنقلاب !! يعنى مش بعيد مع سرعة الأحداث والتقلبات دى  يتم أخونة تركيا بالكامل .. وجايز تُعلن دولة الخلافة من هناك .. وينصَبوا القرد   سلطان  .. ويحققوله أمنية حياته   !!

       وقد تم منع السفر لأى موظف حكومى إلا بإذن من الدولة .. وكمات البرلمان بصدد إعادة عقوبة الأعدام اللى كانوا لغوها  لما كانوا طمعانين  فى الأنضمام للأتحاد الأوربى ..(ولكن نأبهم جه على شونة) .. وكمان البرلمان خلال ساعات سيصدر موافقة بفرض حالة الطوارىء لمدة 6 أشهر .

         والنهاردة الطيران التركى ضرب باخرتين تركيتين حاولتا الوصول للموانى اليونانية .. ويتعقب  حاليا عدد من الزوارق البحرية التركية التى هربت من موانىء تركيا المختلفة ، والله أعلم مين ركابها !!

          وأوضح صورة بتبين المهزلة والفوضى والعشوائية اللى عايشاها تركيا حاليا .. هى أن المليشيات التركية الأخوانية اللى تابعة للرئيس التركى .. بتطارد ، وتسحل ، وتهين ،وتقتل الجيش التركى !!!!!!!!!!!

       تصدقوا بالله .. أنا شخصيا تعبت ، وقلقت ، وأنا بس  باأكتب الكلام ده !! .. فما بالكم بقى بالأتراك اللى عايشين الكارثة دى بكل أحداثها وتفاصيلها ..

       ياأخوانا  دلوقت نقدر نقول وبالفُم المليان .. تركيا على حافة هاوية .. وقردوغان من يوم الأنقلاب وهو عمّال يدق مسامير فى نعشه .. وفاضل له كام مسمار  ونقوله باى باى قردو .

بقلــــــــــــــــم

صـــــلاح إدريــــــــس

  salaahedris@gmail.com                                                 


صلاح ادريس صلاح ادريس
محررين

كاتب صحفى

0  285 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة