ياعزيزى كلنا كاذبــــــــــــــــــــــــــــــــــون !!

سجل دخولك حتى تتمكن من تسجيل اعجابك بالخبر

بالبلـــــدى الفصيـــــــح :

ياعزيزى كلنا كاذبــــــــــــــــــــــــــــــــــون !!

 

     جريدة الجارديان البريطانية  ربنا هداها  ،وضميرها صِحى ، وأعترفت أول إمبارح الخميس  أنه غصب عنها فبركت حوالى 32 تقريرا  ، ومقالا عن مصر .. وأن السبب فى الغلطة دى هو المراسل الصحفى بتاعها بالقاهرة  ، وأسمه  (جوزيف مايتون ) الذى انتهك قواعدها والثقة التى منحتها له ،وكان بياخد معلوماته من الأخوان .. مشيرة إلى أنها حذفت 13 تقريرًا كتبه المراسل ،وبعد ماأكتشف محققوها اللى ـأرسلتهم للقاهرة  أن أغلب التقارير والمقالات كاذبة ، والمصادر مُجهلة ولا وجود لها !! قررت حذفت ما لم تستطع التحقق من صحته من معلومات، وتصريحات  والتى  كان أغلبها نقلاً عن مصادرأخوانية كاذبة ، بعدما أنكرت عدة مصادر رسمية وغير رسمية وذات صلة بهذه الأخبار والمعلومات ، أنها لم  تحدث .. وأن  الصحيفة تابت ،وأنابت ،وبتعتذر للمصريين ولقرائها حول العالم  عن هذه الأخطاء .

        لغاية هنا حلو قوى .. الموقف محترم ، وأحترافى ، وبصرف النظر بقى إذا كانت التوبة دى توبة نصوحة ، ومن قلبها فعلا  .. ولا  أضطرت تتوب بعد ماأتكشفت  ،والسر كان حايبان  ..  حايبان !! مايهمناش الكلام ده .. اللى يهمنا هو أن الجريدة أعتذرت رسميا ..وعلى صفحتها الأولى ، والعالم كله قرأ ماكتبته فى أعتذارها الرسمى .. وأنه من هنا ورايح أى خبر عن مصر حايتكتب في الجارديان  ، أو فى أى جريدة أخرى ، القارىء مش حايصدقه على طول ،ولازم يراجع مصادر عديدة .. خصوصا بعد أعتذار (السى إن إن ) من كام يوم لأسرة الطيار ( محمد شقير ) قائد الطائرة المصرية  المنكوبة ، وعن بثها أخبار سقوط الطائرة بأنه أنتحار للطيار !!.. إذا أحنا على الطريق الصحيح .. ومصداقيتنا بتتأكد ، وتزيد كل يوم شوية بشوية  .. وحتى فى إيطاليا وموضوع (ريجينى ) فبعد ماكانت إيطاليا عن بكرة أبوها مش طايقة تسمع كلمة من مصر !!  لا    من الحكومة أو الشعب .. ولو حد  (كح ) حتى  ..يقولك كذاب  دى مش كُحة !! دى أشارة وشفرة للشروع فى القتل !! .. دلوقت أبتدأت إبطاليا فعلا تعيد دراسة كل حاجة من البداية خالص ..  بعد ماوقع فى أيديها أدلة تنسف كل الأدلة المزيفة ، اللى بنت عليها توقعاتها ، واللى برضة أخذتها من أطراف وجماعات  مُجهلة ،  وتعمل ضد الدولة المصرية  ، وقياداتها وحكوماتها !!!!

       قوم أييييييييه .. ييجى مجلس النواب الموقر  يتنفض .. ويصرخ .. والنواب تصوت ،وتلطم خدودها !! لأن جريدة الجارديان كذبت وأعترفت بكذبها .. وأنها كذبت سنة 2011 بشأن الرئيس مبارك ،وقالت أنه يملك 70 مليار دولار .!!. وأن العديد من جرائد، ومواقع أخبار العالم أخذت منها .. وفى 2013 قالت  وبناءا على تقرير تقصى الحقائق الأخوانى أن الجيش المصرى عذب ،وقتل الكثيرين ،من المصريين .. وقالت أنها أعتمدت فى الحقيقة على مصادر أخوانية أكتشفت كذبها فيما بعد ..

        ياسلاااااااام ياأخويا أنت وهو يانواب الشعب الكرام  .. ماأنتم سامعين الكلام ده من زمااااان  ليه ماطلعش شملول منكم وكذب الأخبار دى ؟ مش بس كده  لكن 90% من الجرائد ووسائل الأعلام المصرية  نقلت الخبر بحذافيره !!وكأنه صادر من مصادرها .. والمصريين كلهم فى الوقت ده كانوا لسه مايعرفوش قذارة وألاعيب الأعلام ..وكانوا بيصدقوا أى حاجة تتقال لهم !! لدرجة أنهم بدأوا يحسبوا كل واحد من الشعب المصرى حاينوبه كام من مليارات مبارك !!.. . وحتى الأعلاميين المحترمين جدا الذين لم بمشوا فى مسيرة القطعان .. صحيح مامشيوش  .. لكن برضه ماأنكروش ولا دافعوش !! .. بما أكد كل الأكاذيب اللى بتتقال سواء عن فلوس مبارك ،أو التعذيب الممنهج ، أو أى كلام بقى أتقال  ولسه للأسف بيتقال لغاية دلوقت ..

     فياسيادة النواب المحترمين  .. أنتم بتقولوا لازم لنا إعلام موازى  ، علشان يرد على أى أكاذيب .. طيب وهو فيه جد ماسككوا .. ماتعملوا ،وتقرروا .. ماأنتم اللى ممشيين البلد دلوقت .. ياللا ورونا رجولة ،وجدعنة كدة وأعيدوا مكاتب الأستعلامات  المصرية اللى كانت لها مكاتب فى كل مدن العالم .. من أفريقيا لغاية أوروبا وأمريكا .. أنتم اللى فى أيديكم القرار ،والتشريع ،والقانون  ..وتشيلوا ده ,,وتحطوا ده .. طيب ماتورونا  كرامة كده  ، وأعملوا حاجة واحدة تفيد البلد .. وكفاية عملتوا كل اللى يفيدكوا من مكافآت ،وبدلات ورحلات .. خلاص بقى  خلوا عندكم شوية من الأحمر .. وأعطوا مصر اللى أعطتكم فى شهور قليلة ،مالم تحصّلوه فى سنوات عمركم كله .

     وياريت نبطل نهاجم الجارديان ،وغيرها ..ونطالب بإغلاقها .. ولو عايزين الحق والعدل و تغلقوها ..يبقى بالمرة أغلقوا كل جرايدكم ، وقنواتكم المصرية قبلها .. لأن الحقيقة اللى يعرفها كل المصريين هى  أننا جميعا كاذبون ..!!!!!

بقلـــــــــــــم

صـــــــــلاح إدريـــــــــــــــــس

salahedris@gmail.com


صلاح ادريس صلاح ادريس
محررين

كاتب صحفى

0  322 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة