عجب العُجاب فى مجلس النواب !!

سجل دخولك حتى تتمكن من تسجيل اعجابك بالخبر

بالبلـــدى الفصيـــح :

عجب العُجاب  فى مجلس النواب !!

من كام يوم  قال الدكتور على عبد العال رئيس مجلس النواب  بصورة ودية وكأنه بيهزر  (( مش عايز أى نائب يعترض على تصرفات الحكومة )) .. وعدت الحكاية دى على أنها مزحة .. مع أنه ماكانش بيمزح .. والوِد   وِده أن الكل يقول آمين عطال على بطال !!!!  لكن النهاردة  حضرته قال : أن بعض المراكز البحثية وعددها 3 تقوم بالتشويش على عقول النواب ، بخصوص السياسة النقدية للدولة .. وممنوع تماما على النواب مناقشة السياسة النقدية للدولة .. ومن سيخالف هذه التعليمات سيُحول إلى لجنة القيم .. يانهار أسود ياولاد .. نواب الشعب مايناقشوش السياسة النقدية بتاعة الشعب .. أمال مين يناقشها ،ويراقبها ياعم الحاج ؟؟ والمهم أن كلامه كان  فى الجلسة العامة .. وتدارك بعدها وقال : أن كلامه موجها لعدد محدود ،ومعروف من النواب  .. لأنهم يغردون خارج السرب .

      طيب ياحاج عبد العال برغم أنه مش من حقك على الأطلاق  أن تمنع أى نائب من الحديث فى أى موضوع يخص الشعب اللى أنتخبه .. وده حسب الدستور ،والقانون ،ولائحة المجلس على فكرة .. لو كنت ناسى ، أو مش واخد بالك !!  .. و بدال الجُرسة والفضايح فى جلسة عامة .. وكلام اللى يسوى واللى مايسواش .. جوه وبره مصر .. وأنتقال الحكاية كالنار فى الحطب الناشف .. يعنى ماكنتش قادر تستدعى الكام نايب دوول فى مكتبك ،وتستفسر منهم ، وتفهمهم الصح ، أو تستدعيهم فى لجنة رسمية ،وتحقق معاهم رسمى برضه ..   وبعدين هو مش المفروض أن أى نائب يلتحق بأحد المراكز البحثية السياسية  ياخد موافقة البرلمان مسبقا برضه ، ولا أيه ؟  ده لو فعلا النواب ألتحقت بهذه المراكز البحثية من غير ماتبلغ المجلس .. لأن مش معقول الــ 437 مادة بتوع لائحة البرلمان الداخلية مفيهاش ولا مادة بتلزم النواب بأعلام مجلسهم الموقر بألتحاقهم بمراكز من  النوع ده !!!.

        و قبل ده كله كان لازم تقول لنواب الشعب اللى بيمثلونا ،وأخترناهم بإرادتنا ،على كل حاجة .. بدءا من أسماء المراكز البحثية دى اللى بتلبس النواب العِمة .. وتشربهم حاجة أصفرا ..وتخليهم يعملوا اللى همه عايزينة .. وينفذوا أجندات خارجية تضر الأمن القومى ..زى ماحضرتك قلت ..لغاية أسماء النواب السُذج اللى أتضحك عليهم !! ومادام أمن قومى يبقى من حق نواب الشعب ،والشعب نفسه يعرف كل التفاصيل .. ولا أنت فاكر نفسك شرلوك هولمز ،وماسك كل خيوط الجريمة فى أيدك ،ومش حاتقولها للقراء إلا فى آخر صفحة .. لأ  ياعمنا  .. طالما أن الحكاية أمن فومى يبقى الكل لازم يعرف .. أو كنت تسكت خالص بدل فضيحة المطاهر ليلة خروجه ع المعاش ..اللى أنت عملتهالنا دى ؟ والعالم كله النهاردة بيتكلم عن أكبر هيئة تشريعية فى مصر  وكل أعضائها منتخبين  ،وهمه زى الأطرش فى الزفة .. مايعرفوش حاجة .. ورئيس مجلسهم مش عابز يقولهم أى حاجة ، وزى مايكون خايف أحسن يجرح شعورهم ..  متحديا بذلك الدستور المصرى اللى كلهم ضاربين بيه عرض الحائظ !!وكأنه لم يكن !!.. ونواب الشعب مالهمش الحق فى مناقشة أهم مايمس الشعب !!.. هو ده الكلام اللى بتقوله كل أجهزة الأعلام الغربية  والأخوانية ،اللى مستنيه على غلطة .. وأنت وأمثالك كتير من المسئولين  بسم الله ماشاءالله عليكم مش مقصرين .. وبتغذوهم على طول بكل أنواع الأسلحة  اللى يدبحونا بيها وفى مقتل .

     وأنت بتقول للنواب ماتتكلموش للأعلام .. حاجة عجيبة ياأخى  يعنى كاتم على نفسهم ،وخارسهم جوه المجلس .. وعايز تكتمهم براه كمان .. ده النواب ياولداه مابيصدقوا يخرجوا علشان يتنفسوا شوية .. ويفضفضوا ،ويقولوا اللى جواهم وخانقهم !!

       طيب ياعم الحاج  لو أنتم عايزين كل النواب موافقة وممشية حالها ،ومفيش أى نقاشات ، ولا أعتراضات .. عملتوا ليه أنتخابات من أصله !!،وصرفتوا مليارات  ،علشان تقولولنا ،وتقولوا للعالم كله أن مصر بلد الحرية والديمقراطية .

     ياأخوانا والله العظيم حرام عليكم .. لو البلد دى حاتتخرب يبقى بأيديكم أنتم اللى عايزين ترجعونا لعصور ( موافقون .. موافقون ) .. والحزب الوطنى ، وحزب السمع والطاعة .. كلنا شايفين الرئيس السيسى بيعمل أيه .. وأنتم مصممين أن تخربوا كل اللى بيعمله .. وكأنه بينفخ فى قربة مقطوعة،والقطع متحدد ومتواصل وبأيدين ناس مسئولة ،المفروض أنها تسد الخروم وراء الريس .. مش تخرم اللى بيحاول يسِدّه ..

        ياأخوانا أنتم كده كل يوم بتجمّعوا  أعداء جداد للدولة .. وبتأكدوا كلام أخوان الشياطين  ،وغيرهم من المتطرفين .. وبتعطوهم الفرصة أنهم يتقولوا  ويتقولوا .. ويقولوا مش معقول أن السيسى مايعرفش  !! وأكيد كل اللى بيحصل ده بمعرفته وتوجيهاته .. لأنه عسكرى .. وأنقلابى .. ويسقط يسقط حكم العسكر .. وأنا بأقول  حرام عليكم  ويسفط يسقط كل غبى  ،وكل متآمر على مصر  ،سواء بعلم وقصد وفهم .. أو بغباء وغشومية ودون قصد ، ولا فهم !!,

         مش عارف ليه حاسس أنى قلت الكلام ده قبل كده .. وحاسس كمان  أنى حاأقوله تانى وتالت .. وياريت حد يفهم .. لكن تقول أيه تِعلم فى المتبلم يصبح ناسى !!!

بقلــــــــــــــــم

صـــلاح إدريــــــــس

salahedris@gmail.com

 

 


صلاح ادريس صلاح ادريس
محررين

كاتب صحفى

0  265 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة