نوابنا يرتكبون جريمة دستورية بأسم الجريمة الأليكترونية !!!!

سجل دخولك حتى تتمكن من تسجيل اعجابك بالخبر

بالبلدى الفصيح :

 

نوابنا يرتكبون جريمة دستورية

بأسم الجريمة الأليكترونية !!!!

..

         علشان الناس سكتت على البرلمان وهو الهيئة التشريعية الأولى بأنتهاكه للدستور .. بمنع أذاعة الجلسات على الهواء ، ومنعت حق المواطن بالمعرفة ، كأنه داخل البرلمان ، كما يقول الدستور .. وهاهم النواب  لما سكتنالهم دخلوا بحمارهم .. وعايزين يمنعوا حرية الرأى والتعبير حتى على الـ 90 مليون مصرى ..   بقانون جديد أسمه (الجريمة الأليكترونية) أ.. والهدف منه واضح ، أنهم يخرِسوا أى صوت ،ويقطعوا أى لسان ، لايحمد بأسمهم .. ويلهث بالدعاء لهم ليل نهار .. والكل وراهم لازم يقول آمين .. والله ساعتها ولو حصل يبقى الشعب كله  يستاهل الضرب بالنار ..  والنواب المحترمين بيتيحججوا بأنهم عايزين وضع ضوابط ومحاذير على الفيسبك .. وشوية شوية  نلاقى الشعب كله تحول لحزب وطنى جديد ( من الخوف )  وأصبح  مشجعا أساسىا ، ورئيسيا  للدولة!!

والله مايحصل أبدا .. وعقولكم المتخلفة  ،الرجعية ،القديمة واللى مش قادرة تفهم أننا خلاص عبرنا  بمصر وأهلها  من عصور الظلام لعصور النور والشمس الساطعة  .. ولازم تفتحوا عقولكم ، ومن غير ماتخافوا أنكم لو فتحتوها أمخاخكم حاتطير ..ياعالم ياللى مابتفهموش ، الحرية  .. والحرية فقط هى الطريق الأمثل لبناء دولة مدنية حديثة .. وأحنا ماصدقنا الناس أبتدأت تحس ،وتشعر باللى بيعمله السيسى  ..وأبتدأت فعلا صورة مصر الحلوة تظهر شوية بشوية .. ليه الأغبياء ييجوا يبوظوا كل ده ،ويقلبوا الترابيزة كالعادة .. الغريبة أن كل النواب اللى موافقين على المشروع المقدم للمجلس قالوا : (( أحنا ماقرأناش المشروع  لكن موافقين عليه )) .. ياراجل يامثقف يامتعلم يانايبنا وخيبتنا القوية  ..أزاى توافق على حاجة ماتعرفش عنها حاجة .. ولا أنت شاهد ماشافش حاجة !!!

        لكن برضه فيه شعاع نور بيطمننا شوية  ،متمثلا فى القليل من النواب المعارضين للمشروع  .. وأنا من هنا بأشكر نائبتنا الشابة الصغيرة  (سارة صالح،) نائبة جنوب سيناء اللى رفضت  مشروع القانون، قائلة : ((إنها لا تؤيد تقييد حريات التعبير والرأي عبر مواقع التواصل ..وأضافت أن المجلس لن يعاقب أصحاب الآراء من مستخدمي مواقع التواصل، معلقةً: "من يريد خلق مشاكل سيقوم بافتعالها سواء عبر الإنترنت أو خارجه، ولن يكون هذا القانون هو المانع((  "... صح لسانك  أيتها النائبة الشابة الشجاعة .. وبأقول لكل أعضاء البرلمان ... لو تم إقرار هذا القانون  تأكدوا أنكم حفرتم قبركم بأيديكم .. وسيكون هذا آخر يوم لهذا المجلس .. وأوعوا .. أوعوا تنسوا أن مواقع التواصل هى اللى أسقطت نظام راسخ فى الأرض 30 سنة ، بكل أجهزته ، وقوته ، ومناصريه .. يبقى من السهل قوى أن المواقع دى تسقط برلمان مِخوّخ جاهز ، ومابقالوش شهور ،  وأعداؤه أكثر من مناصريه .. وسقوطه سيكون فرحا شعبيا للجميع .. فياريت بقى تلموا الدور  وأكفوا ع الخبر ماجور.

                           بقلــــــــــــــم

                  صـــــلاح إدريـــــــــــــــس

            salahedris@hmail.com  

 

 

ــس

                    

 


صلاح ادريس صلاح ادريس
محررين

كاتب صحفى

0  136 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة