يعملوها الكبار .. ويقعوا فيها الصغار !!!

سجل دخولك حتى تتمكن من تسجيل اعجابك بالخبر

يعملوها الكبار ..ويقع فيها الصغار !!

 

          الفتوة الأمريكى ترامب  يعلن أنسحاب أمريكا من الآتفاق النووى الأيرانى من جانب واحد .. وفرض أقصى العقوبات الأقتصادية على إيران .. وطبعا صبيان الفتوة الخمسة الكبار حايمشوا وراه زى القطيع ( كالعادة )!!!!

          طيب وإسرائيل ياابو شنب بريمة  ..  ياترى لسه حاتواصل أمريكا دعم مخزونها النووى الضخم .. وكل العالم عارف أن أسرائيل هى سِتًكُمّ وتاج راسكُم ..وهى المحركة لكل الأمور فى العالم كله.. بداية من البيت الأبيض  .. والمعلومات عن السلاح النووى الأيرانى قالها (النتن ياهو)  من كام يوم علنا  .. وطبعا فوز حزب الله فى الأنتخابات اللبنانية أول أمس .. وتغلغلها فى سوريا واليمن  .. مش مخليكم أنتم وإسرائيل  لا قاعدين على بارد ولا حامى !!

         طبعا حاتقرفونا كلكم كام يوم بالردح فى الأعلام .. وكل واحد منكم حايطلع صبيانه ..ويفرد عضلاته .. وتطلعوا الشوم والسِنج والمطاوى بتاعتكم .. وتنزلوا ضرب وتلطيش فى كل حرافيش الحارة الصغيرين .. علشان تخوفوا بعضكم .. وباقى الحوارى ..وتستعرضوا على الحرافيش !!  

يلعن أبوكم  .. على أبو إسرائيل...على أبو إيران .. ..

ويارب تولعوا كلكم بجاز وسخ ،مشع من مفاعالاتكم النووية  اللى عاملين بيها رجالة علينا !!!

 وبعون الله أستعراض  عضلاتكم على بعضكم .. على حساب الغلابة المغلوبين على أمرهم هنا أو هنا .. حايرجع عليكم .. وحاتولع بينكم حرب مدمرة .. تخلص حارتنا من كل فتوة مفترى وظالم .. وحانقعد كلنا ع الحيطة ..ونسمع الزيطة .. وأحنا عارفين أن حرب الحوارى بتاعتكم دى حاتأثر علينا بشكل كبير .. لكن والله العظيم لو كان التخلص منكم ، ومن غروركم  وأنانيتكم  حايكون السبب فى معاناتنا  كام سنة كمان  فنحن  مستعدين لذلك .. وأتعودنا خلاص ..وياما دقت ع الراس طبوووول !!!

ولنا كلنا ( وأولنا سوريا ) رب يحمينا من أشكالكم القذرة !!

بقلــــــــــــــــــم

صــــــــــــــلاح إدريــــــــــــــس


صلاح ادريس صلاح ادريس
محررين

كاتب صحفى

0  590 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة