ضربوا الأعور على عينه .. قال خسرانه خسرانه !!!

سجل دخولك حتى تتمكن من تسجيل اعجابك بالخبر

ضربوا الأعور على عينه .. قال خسرانه خسرانه !!!

 

        من سنوات طويلة جدا   وأحنا بنطالب بتغيير منظومة التعليم من أساسها .. بدل مايعملوا ولادنا حقول للتجارب .. ومصايب وكوارث سودة كلنا عشناها .. وشوفنا  تجارب الثانوبة العامة ، وماقبلها  كل مايهل علينا وزير تعليم جديد .. وأستمرت على مدار نصف قرن!!

           ولما أخيرا ربنا اكرمنا بوزير تعليم  أسمه الدكتور طارق شوفى  .. راجل فاهم ، ودارس  ،وعارف بيعمل أيه كويس قوى .. ومتشحطط كل ليلة بين القنوات الفضائية علشان  يشرح ويوضح للناس  خططه لتطوير التعليم ..واللى كلها بره الصندوق .

         فجأة وكالعادة  طلع عليه ولاد نمنم من أصحاب المصالح الشخصية ..  مابين مافيا الدروس الخصوصية .. والحاقدين ,,والراغبين على بقاء منظومة التعليم البالية الفاشلة القديمة .. والغريبة أن منهم نفس الناس اللى كانوا طول عمرهم بيطالبوا بتطوير التعليم .. واصبح الكل بيفتى فيما لايعلم .. ولا عجب طبعا .. لأنها  عاداتنا ومش حانشتريها ؟

              واعضاء البرلمان النهاردة هاجموا الوزير بشدة ..وماكنش ناقص غير يضربوه !!  وأوعى حد يفتكر أنهم خايفين على التعليم لا سمح الله ..ولكنهم عايزين يقولوا لناخبيهم أحنا هنا .. وآهوووه معاكم ..وخايفين على ولادكم وتعليمهم ..بس خليكوا جدعان وأنتخبونا تانى فى الأنتخابات البرلمانية الجاية .. بالضبط كده زى ماعملوا فى قانون الأحوال المدنيه ــ  فاكرينه ــ القانون اللى كان حايقضى على الفساد ، والروتين ، والمحسوبية ،  وباشتغل على أدد فلوسهم .. وأشتغلنا ماأشتغلنا سيدى الميرغنى يأكلنا ,, وأول ماالموظفين هاجت  وماجت وزاطت .. فجأة لقينا أعضاء البرلمان من غير ما حتى يفكروا  رفضوا القانون  ..بس علشان خاطر عيون الناخبين ..والنتيجة  هى أن نفس منظومة الفساد فى كل مفاصل الدولة مستمرة  زى ماهى .. بأمارة الرقابة الأدارية اللى كل يوم تمسكلها تلاتة أربعة مرتشين  ، وفاسدين .. وولاد ستين فى سبعين .

         والحقيقة أنا مش فاهم  أزاى ناس جاهلة أو نصف متعلمه ..ومش فاهمة ,, وكلهم خريجى التعليم الفاشل .. وسيبك من الدكتورهات والألقاب اللى بتسبق أسمائهم .. كله بلح وحياتك ,, والناس دى بيناقشوا وزير نشيط وطموح ,,وعايز يطور التعليم بجد  ..ويطلّع لنا ناس بتفهم فعلا.. وتقدر تفكر ، وتنهض بالبلد من خلال  تأسيسها بتعليم جيد .

           والسؤال دلوقت اللى بيفرض نفسه : تفتكروا أن اللى كل اللى عايز يعمله وزير التعليم  حاليا حاييجى أسوأ من اللى فات ؟؟ .. بصراحة  ..ماأفتكرش !!  يبقى أيه المانع أننا نشوف ،ونجرب ، ونسمح للراجل ينفذ خططه للتطوير .. ماأحنا طول عمرنا بنجرب  ، والنتيجة زفت بالثُلُث  ..

قالوا ضربوا الأعور على عينه قال خسرانه خسرانه !!

بقلــــــــــــــــــــم

صــــلاح إدريــــس


صلاح ادريس صلاح ادريس
محررين

كاتب صحفى

0  378 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة