نواب الشعب .. باعوا الشعب !!!

سجل دخولك حتى تتمكن من تسجيل اعجابك بالخبر

نواب الشعب .. باعوا الشعب !!!

        30 عضو يرلمانى أول ماسمعوا عن النية لتحويل أئتلاف دعم مصر لحزب سياسى .. قوااام   قوااام  .. جريوا وأنضموا للأئتلاف ، قبل مايتحول لحزب ..  ويبقى فيه مشاكل فى إنضمامهم بعد كده .. وطبعا أنضمامهم ليس حبا فى الأئتلاف ، ولا فى مصر طبعا !! .. لكن لأنهم عارفين أن هذا الحزب الجديد سيكون هو حزب الأغلبية الحاكم الجديد .. وبكده يبقى كأنك ياابوزيد ماغزيت .

           ورجعنا تانى من أول السطر .. وبنعمل حزب وطنى جديد .. وطبعا كلنا فاكرين لما السادات أعلن عن تأسيس الحزب الوطنى .. كل النواب وقتها  برضه جريوا  وديلهم فى سنانهم  ، وأنضموا للحزب الحاكم الجديد برئاسة السادات ..  وضربوا أحزابهم الأصلية بالجزم القديمة  .. ودى كانت بداية النهاية للأحزاب السياسية فى مصر .

           والزمن بيعيد نفسه .. لكن لا الزمان هو الزمان .. ولا الشعب هو الشعب .. ولا حايرضى بالضرب على قفاه تانى .. وحياة شنباتكم ودقونكم ماحايحصل .. فلو أنتم عايزينها ترجع زى زمان .. قولوا للزمان أرجع يازمان .. فلو أنتوا نسيتوا .. فأنا بأفكركم أن الشعب فاق .. وفهم ..وعرف  مين الوطنى ..ومين الهباش .. النهاش .. نهاز الفرص .. اللى بيدور على أسمن حتة فى الكتف علشان يهبشها ..

 المصيبة بفى أن بعض أعضاء أحزاب الوفد والمصريين الأحرار .. وأحزاب أخرى .. أنضموا للأئتلاف .. طمعا فى مزايا ومكاسب حزب الأغلبية القادم .

           من ناحية  السيسى  بيعمل على إعادة الحياة للأحزاب السياسية فى مصر .. ومن الناحية التانية نواب الشعب عايزين يكتموا على الحياة السياسية .. ويخلوها عزب خاصة لهم ولألاضيشهم وصبيانهم .. زى ماكانوا بيشوفوا اللى سبقوهم من الحزب الوطنى .. وبيتمنوا  يكونوا مثلهم ..  ويتمتعوا بكل المزايا ..والوسايط ..وأبجنى تجدنى..  بس وهمه بيمثلوا علينا الشرف والوطنية والثورية  !! 

لكن الحق مش عليكم الحق على  اللى أنتخبوكم .. والحق الأكبر على اللى حاينتخبوكم تانى .. بعد ماعرفوا حقيقتكم المزرية ..وأنكم دخلتوا المجلس الموقر علشان أنتوا تعيشوا، وتهيصوا  .. على حساب  اللى أنتخبوكم أو حاينتخبوكم .. وإن شاءالله  يروحوا فى ستين داهية !!!!          

بقلـــــــــــم

صـــــــلاح إدريـــــــــس

 


صلاح ادريس صلاح ادريس
محررين

كاتب صحفى

0  102 0

الكلمات الدلالية

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة