عمرو أديب .. ونشفاااان الريق !!!!

سجل دخولك حتى تتمكن من تسجيل اعجابك بالخبر

عمرو أديب .. ونشفاااان الرِيق !!!

 

          عمرو أديب ريقه نِشف  ــ ياكبد أمه ــ  من أسبوعين تلاتة ..وهو بيصرخ ـــ  كعادته ـــ ويحذر المصريين من نشفاااااان ريقهم قريب قوى !! .. وأتكلم عن الفقر المائى اللى بيهدد العالم كله .. وضرب مثل  بعاصمة جنوب أفريقيا ( كيب تاون ) .. والمصيبة السودة اللى حصلت فيها .. ولسه حاتسووود أكتر خلال شهرين .

         وأنا لما حسيت بجدية الموضوع .. قلت أسأل الحاج (جوجل ) .. واللى  بصراحة عمره ماكذب عليه .. وعلى الأقل بيقوللى على كل وجهات النظر .. ويجيبلى الأدلة الدامغة بالمستندات والصور .

           وأكتشفت أن المعاهد البحثية ..وخبراء المياه حول العالم بيحذروا ..وينوروا اللمبة الصفراء بالتحذير .. من حوالى 17 سنه من 1990 .. لكن الحكومات والشعوب عملوا زى ماأحنا عملنا مع عمرو أديب .. ضحكوا  .. وأستهزأوا .. وماصدقوش وعملوا نفسهم من بنها !!!  .

        وجوجل قاللى  أن دول كتير فى العالم حاتفتقر مائيا بحلول عام  2025 .. منهم أمريكا والبرازيل وإيران والصين والهند وسنغافورة وكمبوديا وغيرهم  .. ودول عربية كتيرة منهم مصر والسعودية والأردن وغيرهم .

        طيب ياحاج جوجل أيه بقى اللى حايحصل .. قاللى أمامكم  المثل الحى للبلوى السودة اللى جايللكُم تجرى ..وهى (الكيب تاون ) من دلوقت ..الطوابير بالكيلومترات على الحنفيات العمومية  .. وكل راجل وست وطفل شايله جركن ولا أتنين .. علشان يملأ ميه من الحنفية البعيدة عن بيته  تلاتة أو أربعة كيلومتر   .. والحنفيات واقف عليها حرس من الجيش والشرطة .. وصرف الميه على بطاقة تموين خاصة .. أما المصيبة بالويبة بقى هى أنه يوم  4 يونيه اللى جاى  على طول حاتتقفل كل الحنفيات !! ..  إلا فى المستشفيات .. وبعض الحنفيات العمومية .. وحايكون عليها قفل وحراسة كمان .. وكل واحد كان بيستخدم من 200 ــ 300 لتر ميه فى اليوم .. حايصرف 25 لتر فقط .. يشرب ويستحمى ويطبخ ويعمل كل حاجة منهم !!! .

        والنتيجة المتوقعة مهببة طبعا .. الحرائق مش حاتتطفى .. الأوبئة والأمراض حاتنتشر .. العنف والعصابات حاتكتر لسرقة الميه أو حمايتها  .. الزراعة حاتنتهى والأرض حاتموت .. ومعاها طبعا المزارعين .. وحاتختفى أنواع كتير من الخضروات والفاكهة .. ويرتفع سعر الباقى 800 % ..و البطالة حاتزيد .. والسياحة حاتنعدم .. بعد ماكانت أكثر بلدان العالم فى السياحة .. وممكن أنت بقى تشغل مخك وتتوقع مليون حاجة بسبب نقص الميه .

        أنا مش عايز أوجع راسك بالأحصائيات والأرقام ..خصوصا وأنا عارف أن مافيش حد بيقرأ من أصله .. لكن لو عايز تعرف  تقدر تسأل عمنا جوجل وهو حايقولك كل حاجة ومش حايخبى عليك  ولا حاجة !!!

         ولو عايز تلحق نفسك .. وولادك ..وبلدك .. ياريت تبدأ من دلوقت توفر ولو لتر واحد ميه فى اليوم .. يعنى على قدر قزازة معدنية .. وفرها من حمامك اللى مفتوح ع البحرى .. أو حلاقتك والمية نازلة تشُرّ تشُر من الحنفية ..أو من غسيل عربيتك .. أو من الترطيب والترويق أمام محلك .. أو ... أو .... !!!

((( وياريتك تنشر الكلام ده بالطريقة اللى تعجبك .. لأنه فعلا مسألة حياة أو موت !!!!!!!)))

 

      وسامحنى فى اللى حاأقوله : مش عايزين ييجى علينا يوم بعد ماكنا ندعو لعدم التبول فى الشارع .. إلى أن ندعو لتحويش البول ده فى قزايز .. لأننا لو أستمرينا على السفه اللى أحنا فيه حانوصل لكده !! .. وربنا يخيب ظنى .

بقلــــــــم

صـــــــلاح إدريـــــــــس

Salahedris@gmail.com

 

 

 


صلاح ادريس صلاح ادريس
محررين

كاتب صحفى

0  1119 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة