من حق الكبير يتدلع !!!

سجل دخولك حتى تتمكن من تسجيل اعجابك بالخبر

من حق الكبير يتدلع !!!

 

           رضينا بالهم .. والهم مش راضى بينا !! ..والكلام لنوابنا المحترمين :  يعنى أجبرتونا وأجبرتوا الدولة على أعفاؤكم تماما من كل الضرايب اللى بيدقعها كل المصريين من أفقرهم لأغناهم !!! ... ورفعتوا مكافآتكوا ..وبدلاتكوا .. بحجة الغلاء ..قلنا ماشى ياواد ..ماهمه برضوا ممثلين للشعب وهمه الكبار بتوعنا .. ومن حق الكبير يتدلع !!

          بقالكم 3 سنين منورين المجلس الموقر .. ومضلمين حياتنا كلها  .. وماشفتاش منكم حاجة تفتح التِفس .. وتقول أننا عندنا نواب حقيقيين ، أنتخبناهم بعد ثورتين  ..واحنا  فاكرين حانلاقىهم عملوا  ثورة تالتة رقابية وتشريعية  فى مجلسنا الجديد  .. وكنا مراقبينكوا وأنتوا مابتاخدوش  أى قرار بسرعة وحسم ، وتصويت جماعى إلا بعد تلميحات وإشارات الحكومة ومباركتها .. وكأننا فعلا حزب واحد حكومى .. مافيهوش معارضة !! ..ولو فيه  معارضة بسيطة بتاخد على دماغها من رئيس المجلس ، والأعضاء.. وتسكت فورا .. ولو ماسكتتش تتسحب عضويتها .. أو تُفصل نهائيا  من المجلس  .. وبيتهيألى كمان أن عندكوا أوضة فيران فى البدروم لأى معارض !! وبرضه قلنا ماشى .. ماهى المجالس النيابية فيها من ده   وده !!.

          وحاجات كتيرة بصراحة مستحملينها  .. لكن  أنتوا بصراحة خليتوها خلّ .. بأنكم ماتحضروش الجلسات خالص .. وتقبضوا بدل مبيت ،وبدل جلسات .. ولما رئيس المجلس يقرر ــ أخيرا ــ خصمها من كل المتغيبين .. ويسمى عدد الحضور بــ (الحضور الباهت ) ..بسبب خلو أكثر من 80% من الكراسى من حضراتكم !!.. فى الوقت اللى  مطلوب رأيكم وتصويتكم على مئات التقارير الهامة  ،والقوانين المعطلة ..  تقوموا تثوروا..  وتهيجوا  .. علشان  أنتوا الكبار !! .. ومش عايزين  أى حد يحاسبكوا !! ..ومش عايزين غير أنكوا تاكلوا فى الأتة المحلولة !!! .. لأ  لأ   ياحضرات النواب المحترمين !!!.. الأتة المحلولة دى قوتنا ، ولحمنا الحى .. وأنتم نوابنا المحترمين  .. يبقى ماينفعش تاكلونا يانوابنا المحترمين .. خصوصا وأحنا اللى جبناكوا  !!

         ولأنى عارف إنه قبل الأنتخابات الجاية حانلاقى القاعة مليانة ع الأخر .. زى أول جلسة .. ويمكن تجيبوا ولادكم معاكم كمان !! .. وأنكم حاتعملوا أحلى شغل  ، وأجمل خدمات .. وحايرجع أهالى دوايركوا  الأنتخابية يشوفوكوا تانى  ..وأنتم لابسين زبيبة الصلاة .. وماسكين السِبح .. وبتدوروا  ع الفقراء علشان تساعدوهم !!! هأو هأو أووووو .. خلصت ياحلوين .. أنتخبناكم .. وجربناكم  ..وشفنا آداؤكم .. والنتيجة حاتشوفوها فى الأنتخابات الجاية !!

            وعلشان كده ..كلامى دلوقت بأوجهه لبقية الشعب المصرى  .. فى صيغة سؤال مزدوج :ــ   ياترى برضه حاتنتخب  فى البرلمان القادم .. نفس الوجوه .. وبنفس الطريقة  بتاعة حادى بادى كرنب زبادى ... أو اللى تعرفه أحسن من اللى ماتعرفوش !! ,, أو أنا وأبن عمى على الغريب ؟؟!!..  ولا حاتتأنى شوية .. وتختار بعقلك  أولا .. وبعدين تتمم عليه بقلبك ؟؟

والكورة فى ملعبكم  يامصريين .. ياتكونوا ,, ياماتكونوش !!!

بقلـــــــــــــــــم

صــــلاح إدريــــــس

 


صلاح ادريس صلاح ادريس
محررين

كاتب صحفى

0  639 0

الكلمات الدلالية

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة