اللبان .. لبنُه فاااار و قطًع !!!

سجل دخولك حتى تتمكن من تسجيل اعجابك بالخبر

اللبان .. لبنُه فاااار و قطًع !!!

 

           بيقولك آل أيه .. خبطتين فى الراس توجع !! ده لو كانت الخبطه بعصاية خفيفة كده !!.. لكن لما تبقى عشرات الخبطات  وبمِرّزبة حديد تقيلة  يبقى أكيد حاتموّت .. مش بس تتوجع!!

             حكومتنا الرشيدة وصّلت المصريين لدرجة غليان ماحصلتش قبل كده  !! .. غلاء فى كل حاجة .. وأنهيار شبه كامل فى الصحة  ، والدواء ، والتعليم ،والزراعة .. يعنى موت وخراب ديار !! صحيح المستقبل واضح ومبشر بخير أكيد .. لكن المصريين أتعودوا على مثل ( عيشنى النهاردة وموتنى بكرة ) .. ومع أن ده مش صح .. لكن الفقر والعوزة والجهل  لازم يتعمل حسابهم كويس قوى !!!

          ووسط كل ده  هيئة الرقابة الأدارية برجالها الأبطال كل يوم والتانى تطلع علينا بضبط فاسد ، أو مرتشى ، وممسوك بالجرم المشهود !! يعنى مُتلبس بسريقته ..  ومن كام يوم  أتمسك الحرامى الكبير قوى .. رغم أنه صغير قوى .. اللى أسمه اللبان  وهو موظف بسيط بدبلوم تجارة .. وأشتغل من 25 سنة بهيئة قضايا الدولة ، وهى هيئة قضائية محترمة ..   لكن هو اللى ماكانش محترم أبدا !! .. فصاحبنا اللبان فضل يترقى لغاية ماوصل لمنصب مدير عام التوريدات والمشتريات ؟؟.. ومن ساعتها أو قبلها وهو مشغل الهيئة كلها بقضاتها ،ومستشاريها  ، وموظفيها لحسابه الشخصى .. اللبان قبضوا عليه فى بيته : وبالتفتيش لقووا أيه؟؟ .. لقوه مخبى تحت السرير شنط مليانه بالفلوس،وهى مبالغ بسيطة وهايفة عبارة عن :

24 مليون جنيه مصرى / 4 مليون دولار / 2 مليون يورو / 1 مليون ريال سعودى / وشوية فكة عبارة عن مئات الألاف من العملات المختلفة  / 9 صناديق مليانة مشغولات ذهبية / أراضى وعقارات فى كل مصر /  قرى كاملة بالريف ملكا له / شوارع كاملة بالأسكندرية والقاهرة بكل عقاراتها / عدة سيارات فارهة .. وكل الحاجات دى بأسمه هو .. ولسه جارى البحث ، والتحقيق  ،والتحرى ،علشان يعرفوا كاتب أيه بأسم مراته ،وأخواتها ،وأخواته، وأصحابة ،والسواق ،والبواب ،وكل من له صلة به .. وكمان حساباته بره مصر  فين وكام !!

         الحلاوة بقى أن المقاييس العالمية المعترف بها دوليا بتقولك أن أى ضبطية فساد أو مخدرات أو خلافة بيتم ضبطها  بتبقى 25%  بس من اللى أتهرب أو أتسرق  فعلا!!

أحسبوها أنتوا بقى وشوفوا اللى أتسرق واللى بيتسرق من مصر أدد أيه ؟

                يانهار أبوك أسود ومالوش ملامح .. كل دى فلوس سارقها ، ومستحلها فى جوفك ، وجوف ولادك ، وكمان رايح تحج  ، وتعمل عُمرات من الفلوس الحرام دى ؟ وبالذمة ماأتكسفتش وأنت بتكلم ربك ، وتناجيه فى كل شعائر الحج ؟

             وبذمتكم فين الدولة والحكومة من كل ده  ؟ سواء اللبان ،أو الجزار ، أو الفكهانى ؟ يعنى لو مش السيسى شدد على الرقابة الإدارية وأطلق أيديها على الحرامية  .. كان زماننا لسه بنتسرق من لحمنا الحى ،  وأحنا لسه بنتسرق طبعا  !! ومعتمدين على الله والسيسى والرقابة الأدارية  يكشفوا ويقضوا على كل فاسد ،وحرامى فى البلد  ..  لأنهم بصراحة كتروا ،وتوحشوا قوى قوى قوى !!

            وأكيد الكل بيسأل نفسه  طب ده حرامى بيشتغل فى هيئة قضائية  .. يبقى لازم له شركاء طبعا ، بدليل أن كل مكالماته وصوره متسجله على موبايله ، وفلوسه تحت السرير !! يعنى مِطَمِن ع الآخر وحاطط فى بطنه بطيخة صيفى ــ مع أننا فى عز الشتا ــ            يبقى أكيد مسنود جامد ، أو عارف أنه مسنود .. وشركاؤه اللى ساندينه دوول طلع فيهم الأمين العام للهيئة هو المستشار وائل   شلبى .. ووائل  ده كان مستشار سابق لعدة محافظين .. .. ومسئول بلجنة مراجعة التظلمات الضرائبية ،ومسئول عن نقل وتعيين القضاة أعضاء اللجنة !! والحقيقة أنا حذفت من المقال كلامى عنه لأنه ــ للأسف ــ أنتحر فى محبسه .. ولا يجوز لنا محاسبته دلوقت .. لأنه بيد أيادى الحسيب الأول الحق، العادل ،العدل  !!  والسؤال دلوقت  ياترى فيه قضاة آخرين  ولا لأ ؟ وفيهم مسئولين كبار ولا  لأ ؟ هو ده اللى لازم نعرفه ، وأكيد حانعرفه بإذن الله لأن الرقابة الإدارية مابتعرفش أبوها .. ورجالتها بيواصلوا الليل بالنهار ، علشان يكشفوا كل الحرامية فى القضية دى وغيرها كتير .. وكفاية أننا نعرف أن الرقابة الإدارية  بدأت بالتحقيقات من خمس سنين فاتت !!

         عارفين العيب فى أى فساد قادم على مين ؟ على مجلس النواب المحترم ،اللى خاف من الموظفين  وألغى قانون الأحوال المدنية اللى كان بيضع حدا  لكل فاسد ومُفسد ومستهتر!! ..  فبعد  ماكان القانون الملغى   حاطط عقاب رادع للفاسد والمرتشى .. ومكافأة مجزية لكل شريف مجتهد  .. ونظام محترم يحد من السرقة والرشوة  .. هاج الموظفين وعملولهم بوليكة علشان حسوا أن تكية الميرغنى بتاعة أشتغلنا ماأشتغلنا سيدى الميرغنى يأكلنا  !!حاتتقفل ومش حايلاقوا  سبوبة حلوة بعد كده  !! والنتيجة أن نوابنا المحترمين خافوا  ــ أو أغلبهم علشان مانعممش ــ وعملوا القانون على مزاج الموظفين !! .. رغم علمهم أن ده زعّل السيسى قوى ،لأنه كان عايزها تتصلح من الأساس.. ولكنهم رجعوا  الموظف  يتعاقب بأقصى عقوبة إدارية يومين خصم من مرتبه .. يافرحة أمكم بيكم !!!

           والغريبة ياأخى أن كل الفساد ده .. وكل الملايين دى اللى بتتمسك كل يوم .. والشعب الغلبان مش لاقى ياكل ،ولا يتعالج ،ولا يعلم ولاده !!.. وللأسف وزارة الزراعة بها 24 ألف عامل بالتشجير بيشتغلوا بالعقود ومنذ سنوات .. وعارفين مرتبهم كام  65 جنيــه   (أيوه خمسة وستون جنيها لاغير ) ..فإذا كان حتى المستثمرين الكبار بدأوا يشحتوا ،ومنزلين مناشدة من كام يوم للسيسى  فى جريدة الأخبار

،  علشان ينقذهم ويلحقهم من الأفلاس اللى بيطاردهم !! وإلا حايقفلوا شركاتهم ومصانعم  ، ويتم تسريح مئات الألوف من العاملين فيها لينضموا لملايين العاطلين على القهاوى !!ويبقى لسه بنصدر صور سلبية ، ومنيلة بستيين نيلة للمستثمرين ، اللى حفّينا وبنحفى لغاية دلوقت  من الجرى وراهم .. علشان يرجعوا يستثمروا فى مصر !!

          ولو كنا زمان بنقول مصر مافيهاش حد بينام من غير عشا !!! النهاردة  حانلاقى ناس كتيرررررة بيناموا من غير عشاء ..ولا غدا ..ولا فطار.. ولا بطانية ..ولا علاج ..ولا تعليم .. ولا حد حاسس بيهم !!!!!

            أنا عارف إن مقالى ده سمك لبن تمر هندى .. لكن ده من تأثير ضربات المِرزبة اللى نازله على دماغ السيسى  ــ ياولداه ــ وطبعا نازلة كمان على دماغى ودماغكوا كلكوا ..  والنتيجة بطبيعة الحال تخاريف كتيرة .. ولكنها والله طالعة من الفلب زى ماعودتكوا دايما ..بدل ماالواحد يطُب ساكت من الغيظ والوجع اللى زاد وفاض وطرطش فى كل حتة !!

بقلـــــــــــــم

صـــلاح إدريــــــس

salahedris@gmail.com


صلاح ادريس صلاح ادريس
محررين

كاتب صحفى

0  160 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة