زيادة الروايح النِتنة حاتفطسنا !!!

سجل دخولك حتى تتمكن من تسجيل اعجابك بالخبر

بالبلدى الفصيح :

زيادة الروايح النِتنة حاتفطسنا !!!

 

                النائب مصطفى بكرى فى برنامجه التليفزيونى  ( حقائق وأسرار ) ليلة الخميس 22ديسمبر  قعد يطلب ويترجى الحكومة أنها تعرض على البرلمان الأتفاقيات والمعاهدات اللى بتوقعها .. واللى من ضمنها أتفاقية الحكومة مع البنك الدولى  بخصوص القرض الأخير  .. وتداخل معه تليفونيا عدد من النواب  يحييونه ويطلبون ويرجون من الحكومة نفس المطلب !!!!

        الله  الله   الله  .. هوه فيه أيه ياحضرات النواب المحترمين ؟.. أنتم المجلس التشريعى والرقابى .. ولا ــ لا مؤاخذة ــ مجلس (نواعم كلينيكس؟؟ )..ده لأول مرة  فى الحياة البرلمانية المصرية الدستور أعطاكم الحق بل أمركم ـــ  لأنه من صميم عملكم ــــ أن تراقبوا الحكومة .. وتشرّعوا كل القوانين ، والأتفاقيات قبل ما الحكومة تقول فيها كلمة واحدة !!.. وكمان أعطاكم القوة والحق بسحب الثقة من الحكومة ،والوزراء،  وحتى من رئيس الجمهورية !!.. والقرض اللى لسه  معاليكم ماشفتوش أتفاقيته لغاية النهاردة .. الحكومة خلاص صرفته كله تقريبا ،وأنتم نايمين فى العسل !!!.

 ناس كتير فاكرة أنكم بتاخدوا تعليماتكم من السيسى .. وده غير صحيح بالمرة .. لأنكم متطوعين من نفسكم للنفاق والتزلف ..لأنكم لسه عايشين فى عادات البرلمانات السابقة الموافقون المصفقون !!

            والدليل أنكم جايين تطلبوا وتترجوا ،وأنتم أصحاب الحق والقوة .. والناس أنتخبتكوا وهى معتمدة عليكم فى الرقابة والتشريع .. لكن أنتم أتلهيتوا فى توافه الأمور .. كالجرى وراء بدلاتكم ،ومصالحكم ،وأخذ موافقات الوزراء على مشاريعكم وتخصيصاتكم !!..وسبتوا عملكم الأصلى فى التشريع والرقابة .

              تصدقوا بالله .. أنا شخصيا كل يوم باتأكد أنكم أسوأ برلمان جه لمصر ..رغم التفاؤل الكبير اللى شعر بيه المصريين لما وصلتم للبرلمان .. لكن يظهر أن اللى بيحكم البرلمان ويمشيه على مزاجه هو ( أئتلاف دعم مصر ) اللى أنا مسمية من زمان ( أئتلاف خراب مصر ) .. لأنه يقوم بنفس الأعمال اللى كان يقوم بها الحزب الوطنى  الراحل !!.. يجيبوا اللى عايزينه رئيسا للبرلمان حتى وإن كان ــ لمؤاخذه ــ بطيخه .. ويفصلوا من لا يعجبهم ، حتى وإن كان وطنى مخلص !!.. ويهددوا ويحولوا للجنة القيم كل واحد مش عاجبهم كلامه ، أو شامين فيه ريحة معارضة !!.. ويمنعوا إذاعة الجلسات علشان فضايحهم ،و فضايحكم كلكم ..وريحتكم النتنة ماتطلعش بره المجلس .. ورئيس المجلس من كام يوم هدد الأعضاء بعدم الظهور على قنوات فضائية بعينها ، وإلا  نهارهم حايبقى طين !!.. أومال فين حصانتكم  اللى بتحميكم داخل وخارج البرلمان ؟ ولا الحصانة دى لحاجات تانية ؟

                   لكن تحموا مين وأزاى وأنتم أصبحتوا لقمة سهلة فى أيد ( أئتلاف خراب مصر ) ؟!!! ومن الآخر وبالبلدى الفصيح  أيها السادة النواب المحترمين : لو مش قادرين تشوفوا شغلكم وتمثيلكم للشعب  يكون تمثيل حقيقى ، ومخلص لناخبيكم مش للحكومة !! فبيتهيألى كده تاخدوها من فصيرها وتستقيلوا  من البرلمان !!.. زى ماأستقال الراجل المحترم المستشار سرى صيام من تانى ولا تالت جلسة لما شم من أولها ريحة فساد فايحة ،ومعبأة قاعات المجلس .. وشعر أن مبادىء وأهداف ثورتى 25/30 عمرها ماحاتتحقق مع هذا المجلس الموقر ،والمطيع للحكومة ،  أكثر من العاملين بالحكومة !!

           لو عندكم شوية دم صغيرين  ياريتكم تورونا جمال خطوتكم .. لأن وجودكم زى عدمه !!!.

بقلــــــــــــم

صـــــلاح إدريــــــس

salahedris@gmail.com


صلاح ادريس صلاح ادريس
محررين

كاتب صحفى

0  207 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة