نائب منافق يطلب من الفقير يبيع لباسه !!

سجل دخولك حتى تتمكن من تسجيل اعجابك بالخبر

بالبلدى الفصيح :ــ

نائب منافق يطلب من الفقير يبيع لباسه !!

 

            عمرو أديب إمبارح  الثلاثاء 20 ديسمبر قال فى برنامجه (كل يوم )عن أحد نواب البرلمان المنافقين المتسلقين اللى بياكل فى أتة محلولة ، أنه قال فى الجلسة العامة للمجلس أمس : ((أن رغيف العيش لم يتغير سعره من أيام الملك فاروق))

           قلو كان  ماقاله عمرو صحيحا !! فأنا بأقول للنائب ولكل المجلس : أختشوا بقى على دمكوا !!.. وخللوا فى قلوبكم شوية رحمة على اللى أنتخبوكم ،وخلوكم تلهفوا آلاف الجنيهات  كل شهر من قُوتهم ،وعيشهم ،وحياتهم !! .

           فى الوقت اللى أعفيتم أنفسكم من دفع أى ضرايب من فلوسكم الحرام !! ده غير مصالحكم الخاصة اللى صرفتوا الملايين علشان تدخلوا المجلس وتعملوها !! فيه ناس كتيرة مابتاكلش غير عيش حاف !! والدولار النهاردة وصل لعشرين جنيه .. يعنى أحتمالات غلاء جديد باينة فى الأفق !! وأولها أتفاق وزارة الصحة مع شركات الأدوية على رفع أسعار الدواء للمرة التالتة خلال شهرين من 30% إلى 50% ..أنتم عايزين توصلوا الناس لغاية فين ؟ وعايزين تهيّجوا البلد أكتر وأكتر .. كفاية علينا   الأزهر ومؤسسات الدولة المختلفة اللى بتساعد وبترعى الأرهاب بتجاهل تجديد الخطاب الدينى  اللى لسان السيسى نِشف وهو بيطلبه !! .. والوزارات فيها آلاف المستشارين اللى بيكلفوا الدولة مليارات الجنيهات كل شهر !! والصناديق الخاصة بها مليارات الجنيهات ،ومحدش لا عارف ولا عايز يقربللها .. لأنها التكية اللى الكل بياكل منها سُحت !!  

        والفساد والمفسدين ماليين البلد سرقة ،ونهب ..وعينى عينك !! .. وكل ماتتنيلوا وتتزنقوا وعايزين فلوس  ماتلاقوش أمامكم اللى المواطن الغلبان علشان تبيّعوه هدومه ، بعد ماباع كل حاجة  ..و مش ناقص مما يملكه  غير ( اللباس ).. ولسه مصممين تبيعهوله  علشان يمشى بلبوص وترتاحوا !!

         أرحموا من فى الأرض .. يرحمكم من فى السماء .. رغيف العيش تحته مليون خط أحمر .. لوقربلله حد منكم  يبقى نهار أبوكم أسود من فحم الفرن اللى بيتخبز فيه !! .

جاتكم القرف مليتوا البلد ..وغباؤكم حايوديها ويودينا كلنا فى ستين داهية !!

بقلــــــــــم

صــــلاح إدريــــــس

salahedris@gmail.com


صلاح ادريس صلاح ادريس
محررين

كاتب صحفى

0  152 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة