مغلق ... لأسباب أمنية !!!

سجل دخولك حتى تتمكن من تسجيل اعجابك بالخبر

بالبلدى الفصيح :

مغلق ... لأسباب أمنية !!!

 

            أيها الأمن المسكين .. كم من الجرائم تُرنكب بأسمك .. لغاية ماكل المصريين  دلوقت واثقة أن خراب البلد بإذن الله ..أقتصاديا ،وسياسيا ،وأجتماعيا  وأى حاجة تنتهى بأيا  !! حايكون بسبب الأمن !!!!!!!

           كلنا عارفين معرض ( لو مارشيه ) .. وهو معرض لصناع الأثاث .. وبيتعمل مرة كل سنة ،ومن سنوات عديدة ونجاحه مبهر  ، ويشهد به الجميع .. والشركات علشان تشترك فى المعرض ده بتستعد قبل ميعاده بست شهور على الأقل .. وتبتدى تجهز مبتكرات ،وأثاث ،ومعروضات جديدة تشد المستهلك ، وتجذبه للمعرض ..  وطبعا الشركات بتصرف كتير جدا على هذا المعرض !!

           قوووم أييه ييجى واحد عبقرى أو عدة عباقره ( وماأكثرهم فى بلدنا )  .. يقرروا قبل أسبوع واحد من المعرض أنهم يلغوا المعرض !!! حاتلغوه ليه ياعم الحاج ؟ يقولك  أسباب أمنيه !! (ماهو لما تكون عايز تعمل أى حاجة ومحدش يسألك عن التفاصيل  تقول أسباب أمنية ) .. علشان الكل يحط بُلغة قديمه فى بُقُه ،وماينطقش بكلمة !!.

          لكن لو صح كلامهم والحكاية مخاوف  أمنية فعلا ،فالعذر أقبح من الذنب !! لأننا ماخفناش يوم 11/11 ..والريس صمم على تعويم الجنيه ورفع الأسعار  والكل فى الدولة بيقوله  لأ  ياريس ،  ومتوقعين بلاوى سودة تحصل  !! لكن الريس صمم ومحصلش حاجة !!  ثم إن أحنا نلغى  معرض مدته 3 أيام علشان تخوفات أمنيه  !! يبقى أحنا لامؤاخذه  دولة سايبة  ،ولا فيها أمن ولا هباب أزرق ، وكل اللى بنشوفه وبيتعمل أفلام هندية !!

          لكن ماخطرش فى بال البُعدا  أن المستثمرين اللى بتدعوهم كل يوم لضخ المليارات من الدولارات فى بلدك  حاييجولك إزاى ؟ وأنت أصلا مش قادر تأمن معرض فى محيط أقل من كيلومتر واحد ؟؟.. ورسالتك المباشرة ياناصح لكل العالم : أوعى حد ييجى مصر علشان مش حانقدر نحميكم !!!!

         مش لازم نرمى كل حاجة على  الأمن  زى ماأتعودنا من 40 سنة وأكتر .. والأمن لازم هو أول من يرفض أن يكون شماعة لكل فشل ، بيحصل أو حايحصل فى البلد .. ويقف ويدافع ويضع خططه لتسير كل مخططات الدولة ومستثمريها وأبنائها فى الط ريق اللى مرسوم !!  لكن لو أنتم فعلا خايفين  .. ومش متأكدين من أنفسكم .. ومش قادرين تأمنوا معرض قى أرض  بوسط العاصمة ، ومحاطة بسور، وبها كل الأمكانيات الأليكترونية اللى تساعدكم على أستتباب الأمن !! ، ولكن العيب فيكم أنتم شخصيا !!.. وأنكم سقعانين ،ومش عايزين تقفوا فى البرد  اليومين دووول!! .. والسرير واللحاف والدفاية أهم من سمعة الدولة  ،والأستثمارات والأيدى العاملة !!.. ولتذهب سمعة مصر وأستثماراتها إلى الجحيم !!!.

           لو الحكاية كده فعلا .. يبقى أنا معاكم ياأخوانا ومفيش أحلى من الدفا تحت البطاطين ..وأمامك التليفزيون ،وجنبك المدام بريحتها الحلوة المفحفحة ، ومدفية الحجرة كلها .. وعلى حِجركم أطباق اللب والسودانى ، أو الفستق واللوز ( حسب مركزك ومكانتك يعنى ) .. لكن بصراحة ماأضمنش لك أنه تيجى قنبلة من أى حتة  وأنت فى غرفة نومك ، فتفجرها وتفجر العمارة كلها .. بسبب عدم توفر معلومات عن أى مخاوف أمنية !!!

ربنا ياخد كل الأغبياء  اللى كل مانتقدم خطوة يرجعونا مائة خطوة للوراء !!!

بقلــــــــــــم

صــــلاح إدريــــــس

salahedris@gmail.comمنييه 


صلاح ادريس صلاح ادريس
محررين

كاتب صحفى

0  266 0

الكلمات الدلالية

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة