عايزين رئيس ديكتاتور ..

سجل دخولك حتى تتمكن من تسجيل اعجابك بالخبر

 

عايزين رئيس ديكتاتور .. وصايع .. وقليل الأدب !!

 

            عارفين أيه هى مشكلتنا الحقيقية فى مصر  واللى محدش عايز يعترف بيها؟؟ .. هى أن السيسى راجل محترم ، ومؤدب !! وأحنا ناس لاينفع معاها أحترام، ولا أدب .؟

          زمان وطول عمرى وأنا بأنادى بالحرية والديمقراطية ... لكن  ( فى أواخر عمرى للأسف ) .. أكتشفت أننا لازم يحكمنا راجل صايع  ،وقليل الآدب ، وديكتاتور، وأيده أسرع من لسانه !!.. فقد ثبت بما لايدع مجالا للشك أن المحترم الطيب  لاينفع مع الشعب المصرى!! .. ولا الحكام العرب !!.. ولا حكام العالم كله!!  .. ولازم تكون  أبن ستين فى سبعين علشان تقدر تعيش وسط هذه الغابة المليانة وحوش من كل شكل ونوع !!!.

           خلونى أحكيلكم عن تجربة دولة أفريقية .. هى تنزانيا واللى ظروفها الأقتصادية متنيلة بستين نيلة، زى حالاتنا .. قوووم أيه  الرئيس التنزانى (جون ماغوفولي) .. واللى مسمينه ( البلدوزر ) ..ألغى 20 وزارة من 30 !!  وخللى 10 وزارات بس .. وألغى 90% من مناصب نواب الوزراء ..وألغى كل المستشارين للرئيس، والوزراء!!  وقالك اللى محتاج مستشار يبقى مابيعرفش يفكر لوحده !! وقِلِته أحسن !! ومنع سفر الوزراء للخارج إلا للضرورة القصوى جدا جدا ، وعلى الدرجات السياحية العادية !! ..وألغى مناصب رؤساء مجالس إدارات 80% من الشركات والهيئات الحكومية .. وأحتفظ بالمديرين بعد تخفيض مرتباتهم للنصف .. وأصدر أوامره بملاحقة المتهربين من الضرائب ليل ونهار .. واللى بيثبت عليه التهرب الضريبى يبقى نهار أبوه أسود ،والسجن مصيره!! .                 ونتيجة لهذا كل شهر  بيجمع من متهربى الضرائب حوالى 500 مليون إلى 800 مليون دولار .. وعامل حملة  شعواء على الفساد والمفسدين.. وكل أسبوع يعمل زيارات مفاجأة بنفسه  لكل مؤسسات الدولة  .. وفى كل مرة يتم فصل وحبس أكتر من 100 شخص من كبار المسئولين ومساعديهم !!وكل الفلوس اللى وفرها  وجهها للتعليم والصحة والبنية التحتية .

                    الرئيس التنزانى مابقالوش فى الحكم عام واحد .. وأستطاع خلاله أن ينقل تنزانيا إلى واحدة من الدول الواعدة والمتقدمة .

         وعلى فكرة الرئيس السيسى بيعمل كده ــ إلى حد ما ــ بس بأدب ، وبشويش ، ودون إعلان .. والمطلوب ياسيادة الرئيس  هو أن   تكون سرعتك فى المشروعات هى نفس سرعتك فى القضاء على الفساد .. وهى نفس سرعتك فى التقشف المطلوب  لتوفير مليارات الدولارات .. وأستخدامها للصحة ،والتعليم ،والعشوائيات ،والطرق .. مطلوب نفس سرعتك فى إنهاء الصناديق الخاصة ،  وضمها لميزانية الدولة .. مطلوب  إنهاء أعمال 99% من المستشارين بالوزارات المختلفة.. والتى  تتعدى مرتباتهم  بضعة مليارات شهريا !! وهم يحضرون ساعة واحدة للوزارة  ( ده لو حضروا يعنى ) !! .. مطلوب منك ـــ وأبوس أيدك ودماغك ـــ  أن تغضب ، وتحمر عينيك ، وتمسك كرباج فى أيدك!! .. وبلاش ياسيدى تضرب بيه علشان عارفينك محترم .. لكن هَوِوش بيه بس !!.. وصدقنى البلد والحكام العرب كلهم مش حايتعدلوا إلا بالطريقة دى !!.. ولو مش مصدق  ياريت ترجع للتاريخ بتاعنا كله من أوله لآخره .. وسيدهشك أن أسوأ فترات حياتنا هى اللى بنعيشها دلوقت !! بعد ثورتي يناير ويونيه .. ضاعت الأخلاق .. والمُثل .. وزاد الفساد والمفسدين  .. وعدم أحترام الكبير .. والتقاعص .. والهوان .. والتسيب .. والفوضى .. والأستهبال .. والتواكل .. والمنفعجية .. والكولجية ..والأحتكار ..  وتجار الدين .. وكل الموبقات اللى فى الدنيا حصلت بعد ماحصلنا على حريتنا !! وماشيين فى طريق الديمقراطية!!

 يلعن أبو دى حرية .. ويلعن سلسفيل دى ديمقراطية !!

بقلــــــــــــــــــم

صـــــلاح إدريــــــس

salahedris@gmail.com

 

 


صلاح ادريس صلاح ادريس
محررين

كاتب صحفى

0  139 0

آخر المجبين بالخبر

التعليقات


اكتب تعليقك هنا

اخبار مشابهة

اخبار مقترحة