الرئيسية / اقلام ومقالات

مجلس نواب عقلاء .. وشعب أهبل وبريالة !!!

15:24 2016 مارس 28 ،الإثنين

4.0 من 5

صلاح ادريس

بالبلــــدى الفصيــــح :

 

مجلس نواب عقلاء .. وشعب أهبل وبريالة !!!

 

عارف لما تكون مزنوق فى كلمة قبيحة أو خارجة وتبص تلاقى ولادك الصغيرين قاعدين معاكم  ، فتقوم تشخط فيهم من غير مناسبة  ، قوموا خشوا أوضتكم ياعيال !!!

هو ده بالضبط اللى بيعمله  معانا مجلس نوابنا ، اللى أحنا أخترناهم ــــ ياريت كانت أيدينا أتقطعت ، ولا جالنا شلل رعاش قبل مانختارهم ـــــ فمن ساعة مابدأ المجلس الموقر ، وبعد جلستين تلاتة أتذاعوا على الهواء ، وأكتشف رئيس المجلس  والبعض من أئتلاف دعم مصر أن أذاعة الجلسات حاتفضحهم فضيحة المطاهر ليلة خروجه ع المعاش ، فقرروا أنهم مايذيعوهاش بحجة أنهم مش عايزين الشعب القاصر أبوريالة  ولسه بيرضع ، يسمع  الكلام الخارج والقذر ،والتصرفات الهبلة اللى بتطلع من النواب !! والحقيقة أنهم أشتغلوا 21 يوم  ،وأخدوا أجازة 75 يوم .. وفـى الــ 21 يوم  دوول أكتر حاجة عملوها  وركزوا عليها هى  تحديد مكافأة النواب بالساعة ، بدل الجلسة .. وتحديد بدلات السفر ،والمرض ،والعلاج ،والسيارة  ،والسكن .. والموافقة بالأجماع على إنشاء نادى أجتماعى للأعضاء .. وتنظيم رحلات لدبى ، وبعد المجهود الجبار اللى عملوه طول الــ 21 يوم الخالدة .. وكأننا أنتخبماهم علشان بكونوا نفسهم ، ويعملولهم فرشين حلوين على قفا اللى أنتخبوهم

ونسيوا كلهم أن الشعب خلاص وصل لسن الرُشد  ،وأن هو اللى أتنيل وجابهم ،ورزعهم على الكراسى اللى لازقين عليها .. والغباء المستحكم ماخلاهومش يدركوا أن لو الجلسات ماأتذاعتش فهى حاتتسرب .. ولو ماأتسربتش فالناس حاتخمن .. والعيال اللى قاعدينلهم ع الواحدة على مواقع التواصل ،مش حاتسيبهم فى حالهم  ،وحايخمنوا اللى أتقال ،وأكيد حايكون أزيد بكتير جدا جدا من اللى أتقال فعلا .. بالظبط زى ماكنا زمان بنسمع إذاعة إسرائيل علشان ماكناش بنصدق إذاعتنا المصرية ،اللى كانت بتذوّق كل حاجة ،وعايزة الدنيا حلوة فى عيوننا على طول .

إمبارح رئيس الوزراء ألقى بيان الحكومة ،ومن قبلها بيوم والنواب والمجلس بيقولوا حايذيعوا الجلسة على الهواء .. لكن كلام الليل مدهون بزيدة ، وأول ماطلع النهار وأتعرض للشمس  ساحت الزبدة مع الكلام .. وقررالمجلس مايذيعش البيان على الهواء  ،خوفا من أى كلمة من هنا ولا من هنا تجرح آذاننا ،وشعورنا المُرهف ..رغم أن المادة 120 من الدستور المصرى بتقول بصراحة ووضوح أن من حق الشعب يطّلع على جلسات البرلمان مباشرة ،وكأنه حاضر الجلسة .. وعيب قوى أن مجلسنا التشريعى الأكبر  يخالف تشريعات الدستور  .. المهم أنهم بعد ماأتأكدوا أن مافيش حاجة وحشة أتقالت أو حصلت ، راحوا ذايعين التسجيل بالكامل .. ومش حاأتكلم عن بيان الحكومة دلوقت ، برغم أنه تقليدى ككل بيانات الحكومات المصرية المتعاقبة خلال 60 سنة ، لكنى أراه جيدا ، فعلى الأقل واضح المعالم ،وواقعى  وبه جداول ،وتواريخ محددة .. وعايزك تعمل مثلى وتنسخ البيان بالكامل ،وتخليه قدامك علشان تتابع ،وتراجع ،كل مايتم حسب الجداول بالبيان ، وأى تقصير أو تأخير يبقى لنا كلام تانى ساعتها .. لكن أنا اللى غايظنى ومطلع عينيا هو البرلمان ، بقيادته الضعيفة ،الهشة ،ونوابه اللى نصهم هو اللى بيتحكم فى كل حاجة ،والنص التانى أغلبه ماشى وراهم كالقطيع .

يمكن مجلس النواب فيه حاجات وقرارات كويسة ،وإجراءات جيدة بتتاخد .. لكن طول ماهمه مخبيين ، ومكتمين ، يبقى عمرنا ماحانصدق أى كلام يطلع منهم حلو ولا مر .. وسلمولى ع الشفافية اللى خوتونا بيها ليل ونهار !!

جاتكوا القرف .. مليتوا البلد بقرفكم !!

بقلــــــــــــــــــم

صـــلاح إدريــــس

salahedris@gmail.com

 


عدد مرات المشاهده:380


اقلام ومقالات -> مجلس نواب عقلاء .. وشعب أهبل وبريالة !!!

الكلمات الدليليه

مجلس نواب عقلاء .. وشعب أهبل وبريالة !!!

اضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


*
*
*ادخل تعليقك.

التعليقات

لا توجد تعليقات على هذا الموضوع


المقالات

الاكثر تعليقا الاكثر مشاهدة الاكثر تقيما

الفيديوهات

الاكثر تعليقا الاكثر مشاهدة الاكثر تقيما

معرض الصور

الاكثر تعليقا الاكثر مشاهدة الاكثر تقيما

      مصنع سينا للانتاج اللمبات الموفرة

كشرى بامبو الطعم حكاية الان بخليج نعمة والهضبة

     

استطلاع الرأي

هل تريد أن تنضم لفريق المراسلين

تواصل معنا

يمكنكم إرسال مقترحاتكم وآرائكم بالضغط على الرابط التالى
Responsive image

جميع الحقوق محفوظة لـ الوطن Eg 2017

Powered by SotMasr.com
TAFRA CMS V1.5.0